Александар Василевски – Нинџа денеска утрово се предал пред надлежните органи, потврди денеска Основниот суд Скопје 1.
„Василевски денеска утрово се појави пред судијата на претходна постапка по што му беше предадено решението за притвор и беше упатен на издржување на мерката притвор во затворот во Шутка“, велат од скопскиот Кривичен суд.
Александар Василевски – Нинџа е еден од осомничените за крвавите настани во Собранието од 27 април 2017 година и се бараше со меѓународна потерница.
На крајот на март годинава се предаде и Никола Митревски – Кољо по што исто како и Василевски одма беше бил одведен во притворското одделение на Истражниот затвор во Шутка.
Василевски и Митревски се обвинети дека биле логистикчка поддршка на Горан Грујевски и Никола Бошковски во обидот за бегство на поранешните разузнавачи во Грција.
Никола Митревски Кољо освен тоа е обвинет и дека е вмешан со настаните на 27 април во Собранието. Тој е обвинет дека на 27 април во 14.30 часот добил телефонски повик да ја започне акцијата за упад во Собранието. Бил контактиран од човек од обезбедувањето на тогашниот лидер на ВМРО-ДПМНЕ, Никола Груевски со кого заедно биле во Виена, Австрија,
Претходно беше приведен и Младен Додевски, кој е дел од групата од петмина осомничени за кои беше распишана потерница. На нив им е одреден притвор. Делото за кое се сомничат е терористичко загрозување на уставниот поредок и безбедноста.
Според веб-страницата на МВР за потраги, сè уште недостапни за полицијата се Дејан Давидовски и Митре Питроповски исто така осомничени за терористичко загрозување на уставниот поредок и безбедноста.