Откажувањето на самитот во Охрид треба да се протолкува како јасна порака за системските грешки на надворешната политика на Македонија која после овој настан ќе мора да се преиспита.
Вака го толкуваат неуспехот да се организира самитот во Охрид, професорот Денко Малевски и аналитичарот Арсим Зеколи.
Она што сега се случи зборува дека солидарноста на повеќето земји и на Европа е на страната на Косово, а ние ја избравме погрешната страна, вели универзитетскиот професор по меѓународна политика Денко Малески.
Според Малевски македонската дипломатија требала да го третира проблемот во контескт на ЕУ и нејзината улога во релациите меѓу Приштина и Белград.
Ако се држеше во тој контекст, македонската дипломатија требаше да упати покана до Косово, а потоа Србија да ја остави да се прилагоди на ситуацијата, вели за НОВА професорот Малевски.
Неумешоста на македонската дипломатија да се снајде во ситуацијата, според Малевски, вешто ја искористила и Србија. Дипломатската немоќ на Македонија беше добро алиби за српската страна, која преку српскиот потпретседател Александар Вучиќ, соопшти дека Србија не инсистирала Косово да не биде покането.
За аналитичарот Арсим Зеколи вината не треба да се бара само во претседателот Иванов, туку пошироко во се повидливите системски проблеми на македонската дипломатија и надворешната политика.
Очигледно има нешто погрешно во нашата надворешна полтика, вели Зеколи за НОВА.
Тој смета дека претседателот требал да направи напори да се одложи самитот и да се добие повеќе време за негово организирање.
Иванов имаше непотребно емоционален настап објавувајќи ја одлуката за откажувањето на самитот, вели Зеколи и додава дека на овој начин е направена уште поголема штета на целиот процес на соработка во регионот.