Двајцата анестезиолози од гевгелиската болница се суспендирани од работа додека не заврши истрагата за родилката и нејзиното бебе кои починаа во текот на операцијата со царски рез.
Издадена е наредба да се стопираат сите операции во гевгелиската болница, а итните случаи да се препраќаат во болницата во Струмица. Ова за НОВА, го потврди директорот на болницата, Сретко Јованов.
Некои медиуми објавија неофицијални информации дека двајцата анестезиолози биле пијани во текот на операцијата, но официјална потврда од обвинителството се уште нема.
„Одлучивме да ги суспендираме и двајцата додека не заврши истрагата. За тоа дали е пронајден алкохол во крвта се уште немам официјална информација. Јас бев присутен во текот на операцијата кога беше присутен само едниот анестезиолог и не ми остави впечаток дека е во алкохолизирана состојба“, изјави за НОВА, директорот Јованов.
Тој вели дека ситуацијата почнала да се комплицира уште на почеток, а анестезиологот се обидувал да ја реанимира.
Но, тој не објасни зошто овој лекар одеднаш избегал од операционата сала. Сопругот на 32 годишната Маја, Мите Кадиев вчера изјави дека анестезиологот бил пијан за време на царскиот рез.
„Слушнав дека гинекологот зборува на телефон со директорот на болницата и му рече „Дојдете да видите во каква состојба ви е персоналот. Пред да се јави ми кажа дека не може да ја направи операцијата додека анестезиологот е во таква состојба. Два пати пробувал да и стави тубус и не можел да го стави. Општо е познато, а и полицајците кажаа дека тој анестезиолог, а и другиот, кој не знам дали беше таму, постојано се пијани. Затоа и доцнеше операцијата еден час“, рече Кадиев.
Младата родилка, 32 годишната Маја и нејзината неродена ќерка беа погребани на гробиштата во Дојран. Нејзиниот сопруг Мите Кадиев обвини дека анестиолозите биле пијани за време на породувањето и дека правдата ќе ја бара до крај.
Тој за НОВА изјави дека верува во резултатите од обдукцијата кои се очекува да бидат готови за неколку дена. Се чекаат и резултатите од анализата на крвта на анестезиолозите и дежурните гинеколози од кои треба да се утврди дали имало алкохол и други недозволени супстанции.