Вицепремиерот за економски прашања Кочо Анѓушев, по барањето од граѓански организации да се промени трасата за изградба на гасоводот која минува кај Водно за да не се оштетува шумата, вели дека ќе биде компензирано какво било оштетување.
Според него, и да се избере нова локација и траса и на неа ќе се испречи дрво и друга природна убавина која ќе треба да биде санирана. Исто така, наведе и дека промената на трасата ќе го одложи снабдувањето со гас на одредени региони во Македонија на подолг период, од три, четири, пет години, а можеби и повеќе.
„Она што е направено со интервенции во постојните траси на градење е максимално избегнато да се оштетува шумата на Водно и тука ќе биде минимизирано какво било оштетување. Тука Владата ќе биде многу ригорозна преку своите механизми во санирање на таквата состојба и компензирање на се што ќе биде оштетено“ рече Анѓушев и додаде „ Јас лично ќе бидам поборник за секое исечено дрво да бидат засадени најмалку десет“.
По средбата со надлежните институции, граѓанските иницијативи соопштија дека остануваат на ставот дека се против изградбата на гасовод низ парк-шумата Водно.
Една од причините како што велат, е што парк-шума Водно е заштитено подрачје, дом на загрозени, ретки и ендемични видови.