Во однос на последните информации, видеа и фотографии кои се појавуваат на социјалните мрежи и во некои медиуми, сакаме јасно да нагласиме дека нашето здружение се оградува од било какви вербални напади или инциденти кои се случиле по завршувањето на протестот по повод првото рочиште за случајот со Феликс, предизвикани од поединци кои учествуваа во истиот, велат од Здружението Анима Мунди.
Здружението го организирале собирот пред судот, нивните барања се: воведување на засебно кривично дело: борби со животни, засебно кривично дело: напуштање животни и воведување на засебна безбедносна мерка – забрана за стекнување и чување животни која може да се изрече за најтешки случаи на злоупотреба на животни кога околностите на извршувањето упатуваат на опасност од повторување на кривично дело.
Во согласност со оваа цел, категорично се противиме на каква било форма на насилство и никогаш нема да охрабриме, поддржиме или учествуваме во дејства кои го нарушуваат правниот поредок. Бараме и се бориме за правна држава и правосуден систем, кои треба да обезбедат правда за сите. Затоа и бевме дел од протестот – за да се бараат правни мерки за санкционирање на сторителите.
Имаме целосно разбирање за емоциите и болката на сите оние кои го познаваа Феликс, како и на сите оние кои доживеале слични трагедии. Сепак, апелираме до сите активисти, здруженија и поединци на трезвеност и фокус и да не го земаат законот во свои раце. Наместо тоа, енергијата треба да се насочи кон превенција на ваквите случаи на мачење и убивање животни и обезбедување соодветни санкции за сторителите преку правниот систем.
Очекуваме дека ќе биде изречена најстрога казна, со што ќе се пратат јасни пораки дека секој кој го прекршува законот ќе биде казнет, а институциите ќе ја обезбедат правдата, без потреба од граѓаните да ја земаат во свои раце, стои во соопштението испратено од здружението Анима Мунди.