Предлогот на СДСМ за претседател на Анкетната комисија за црниот понеделник да биде Лилјана Ингилизова. ВМРО-ДПМНЕ прифатила, но под услов одлуките да се носат со консензус, потврдуваат за НОВА извори во СДСМ.
Одлуката се уште не е донесена и разговорите се уште траат, со оглед на условот кој го поставува ВМРО-ДПМНЕ, а според правилата, после усогласување на ставот за претседател на Комисијата, претставниците, односно генералните секретари на владејачката ВМРО-ДПМНЕ и најголемата опозициона партија треба да одат на средба кај претседателот Иванов.
Досега, познати се имињата на универзитетските професори Љубомир Фрчкоски и Рената Дескоска како претставници на СДСМ и пратениците на ВМРО-ДПМНЕ, Благородна Дулиќ и Илија Димовски, како четворица членови на комисијата за расветлување на инцидентот во Собранието од 24 декември.
Како што е познато, во извештајот од април Европската комисија стартот на преговори за Македонија го услови со резултати од мартовскиот договор помеѓу ВМРО ДПМНЕ и СДСМ, а препораката зависи директно од тоа дали ќе се формира анкетната комисија за расчистување на инцидентите од 24 Декември, како и останатите услови- дали ќе се продолжи дијалогот со новинарите и склучувањето на меморандумот за соработка помеѓу партиите.
Еврокомесарот за проширување Штефан Филе на прес -конференцијата околу априлскиот извештај рече дека не е задоволен од тоа како тече имплементацијата на договореното помеѓу партиите од март.