Уапсени демонстранти и членови на навивачки групи. Повеќемина повредени на црногорската Парада на гордоста, меѓу кои и претставници на тамошната влада кои беа во делот од 40ината поддржувачи на манифестација на организација на црногорската ЛГТБ заедница.
Освен тоа, Парадата резултираше и со демолирање на некои угостителски објекти во Будва.
Првата манифестација од овој вид организирана во Црна Гора започна под ѕидините на Стариот град и покрај спротиставувањето на големото мнозинство на жители на Будва и нивните гости, како и претставници на некои политички партии, кои поради можност од избувнување безредија бараа најавената манифестација да се одложи.
Врз учесниците кои носеа обележја во боите на виножитото и транспаренти „Излекуваме од шифоњерот“ и „Доста е молк”, во текот на прошетката по улиците, беа фрлани разни предмети, меѓу кои и димни бомби.
Заменик-директорот на полициската управа, Никола Јањушевиќ изјави дека се повредени околу дваесетина демонстранти, како и дека има повредени и на двете страни, па и меѓу припадниците на полицијата.
Поради можни поголеми безредија, четириесетината учесници во Парадата на гордоста коишто беа обезбедувани од 400 полицајци, Будва ја напуштија со брод.
Според организаторите на парадата,ова било тест за демократските капацитети на државните институции и општество и се надеваат дека ќе придонесат на поголемо разбирање и интеграција на припадниците на сексуалните малцинства.
ВИДЕО: Нереди и приведувања на Парадата на гордоста во Будва
Манифестацијата, како што истакнаа, ја одржале токму во Будва за да му покажат на светот на кое ниво на демократичност е црногорското општество.
Задоволни се од однесувањето на полицијата, и со фактот дека меѓу противниците немало многу жители на Будва.
И покрај најавите во медиумите, во манифестацијата не учествуваше премиерот Мило Ѓукановиќ, кој во времето на нејзиното одржување во црногорскиот парламент имаше „премиерски час”, односно одговараше на пратенички прашања.
Осврнувајќи се на парадата во Будва, премиерот Ѓукановиќ истакна дека доколку низ државната политика се промовираат правата на сите луѓе и се носи стратегија за заштита на малцинските групи, па и на сексуалните малцинства, тогаш така и треба да се однесува.