Десет арапски држави вклучувајќи ја и Саудиска Арабија се согласија да соработуваат со САД со цел да се справат со заканите на џихадистите од Исламската држава.
По разговорите со американскиот државен секретар Џон Кери во Џеда, тие се согласија да помогнат во спречувањето на проток на средства и нови борци.
Кери се обидува да создаде коалиција против војниците коишто контролираат големи делови од Сирија и Ирак. Сепак, Русија ги предупреди САД да се воздржат од користење воздушни напади во Сирија.
Руското Министерство за надворешни работи изјави дека секоја таква акција, без поддршка од Обединетите Нации ќе се смета за „акт на агресија” и „сериозно прекршување” на меѓународното право.
Американскиот претседател Барак Обама се закани со акција против Исламската држава, а Кери има задача да се обиде да формира регионална коалиција против милитантите.
По состанокот се донесе заедничка изјава во која се зборува за обединување против силите на џихадистите. Исто така, на состанокот се разговарало за стратегиите со кои ќе се одбранат државите од Исламската држава, вклучувајќи ги Ирак и Сирија.
Освен Саудиска Арабија, од арапските држави беа присутни и Бахреин, Египет, Ирак, Јордан, Кувајт, Либан, Оман, Катар и Обединетите Арапски Емирати. Присутна беше и Турција, но не ја потпиша заедничката изјава.
Обама истиот ден изјави дека секоја група која се заканува против Америка „нема да најде засолниште”. Тој, исто така, најави дека 475 американски војници ќе бидат испратени во Ирак, но нема да имаат улога да се борат.