Воените власти во Скопје не ја исклучуваат можноста наскоро и Армијата на РМ по „рецептот“ на соседна Србија, на кредит да купи борбени авиони, објавува српскиот весник „Вечерње новости“.
Според нив, веста е објавена заедно со анализа на информацијата дека военото воздухопловство на Српската војска преку кредити со Руската Федерација ќе ја модернизира флотата со шест авиони „mig -29M2“.
Заменик министерот за одбрана Емил Димитриев изјави дека „сите опции се отворени“ и дека не е исклучена можноста, како Србија, така и Македонија „наскоро да издејствува набавка на авиони со помош на странски кредити“. Со констатација дека склучениот аранжман меѓу Белград и Москва и овозможува на Србија една од најголемите воени набавки во последните две децении, во истовреме се заблежува дека „за разлика од Србија и македонската авијација и Противвоздушната одбрана имаат оскуден арсенал оружје…“
Димитриев потсетува дека голем број држави набавката на воена опрема ја прават преку користење на такви кредитни поволности и затоа нема причина тоа да не го стори Македонија.
На воениот дел на скопскиот аеродром, потсетува весникот, уште од 2004 година стојат четири повеќе наменски авиони „SU-25“, чија намена, според реформските препораки на НАТО, се прогласени за „невклопливи“ со воздухопловните сили на Македонија.
Воените власти во Скопје немаат изграден став и стратегија што да се прави во формално отпишаните четири воени авиони, купени во Украина во времето на воените судири со паравоените формации на Албанците во 2001 година.
Своевиден кадровски куриозитет е поставувањето на Талат Џафери, еден од воените команданти на таканаречената ОНА која 2001 војуваше против воено-полициските сили на Владата во Скопје, сега – за министер за одбрана, објавува „Вечерње новости“.