Бугарската авиокомпанија „Гуливер“ престана со продажба на билети за релацијата Софија – Скопје – Скопје по 21 мај, објави интернет порталот exyuaviation.com, пренесуваат бугарските медиуми.
Релацијата беше обновена пред повеќе од еден месец, поточно на 26 март и на првиот лет патуваа 22 лица. Авиокомпанијата првично се обврза да ја опслужува линијата двапати неделно – во сабота и во понеделник.
Интернет страницата на компанијата „Гуливер“ не нуди никакво известување за прекинот на летовите на релација Софија – Скопје и обратно, ниту, пак, зошто не може да се купи билет по 21 мај.
Министерот за надворешни работи Бујар Османи денеска рече дека причина за прекинот најверојатно се преговорите што ги води авиокомпанијата со бугарската Влада во делот на субвенционирањето.
„Кога го разгледувавме ова прашање, разговаравме за две опции. Првата беше да биде целосно комерцијална, односно дали ќе има интерес од патниците, а втората да биде субвенционирана од владите при што таа обврска ја презеде Република Бугарија. Мислам дека првата фаза беше обид да се види комерцијалната рентабилност. Според моите информации, мислам дека ова запирање е процес на преговори меѓу компанијата и Владата дали ќе има поддршка или не“, изјави Османи.
Ниту од „ТАВ Македонија“ немаат информација од авиокомпанијата за прекин на авиолинијата Софија – Скопје.
„Моментно немаме никакви информации од страна на авиокомпанијата за прекини во најавениот распоред на летање“, велат од „ТАВ Македонија“ по информациите дека авиокомпанијата „Гуливер“ ја прекинува продажбата на карти за оваа линија.
Од Владата информираа дека воспоставувањето на авиолинијата не е субвенционирано од нивна страна и за сите одговори упатија на адреса на авиокомпанијата.
„Во однос на авиолинија Софија – Скопје, информираме дека авиокомпанијата која го оперира овој лет нема склучено договор за финансиска поддршка со Владата на Република Северна Македонија, преку Министерството за транспорт и врски. Според информации со кои располагаме, авиокомпанијата има одобрено термини (слотови) за полетување и слетување и во текот на овој месец“, стои во одговорот на Владата.