Издавачката куќа Сакам Книги објави дека познатиот автор на трилери Крис Картер доаѓа во Скопје како дел од неговата турнеја.
Неговите изданија досега во Македонија се продадени во над 10 000 примероци за
релативно краток период од околу две години.
Крис Картер со неговите читатели ќе може да се дружи на 7. мај со почеток од 12
часот во салата Борис Трајковски, во рамки на Саемот на книга, каде ќе потпишува
примероци од неговите книги за читателите, како и наредниот ден во Синеплекс со почеток во 18 часот.
Разговорот со Крис Картер ќе го води Јордан Коцевски, автор на психолошки трилери, а ќе може и публиката да поставува директни прашања до авторот.
Крис Картер е роден во Бразил, а по завршувањето на средното образование оди во САД каде студира психологија со специјализација за криминално однесување. Како криминален психолог има работено неколку години, а потоа почнува со музичката кариера како професионален музичар. Пред неколку години се откажал од сето тоа за да стане писател со полно работно време.
Издавачката куќа Сакам Книги најавува и промоција на четири нови романи од македонски автори, како што е авторот Далибор Трајков со неговиот нов трилер „Траги од минатото“, потоа Оља Петрушевска-Томева која со „Сагата на Рајна“ доживеа голем успех, за овој саем на книга ќе ги израдува нејзините читатели со нов роман, „Најслаткиот филџан кафе“.
Саша Богдан ќе ја читаме со ново дело, меѓутоа сосема различно од нејзините претходни – овој пат трилер насловен „Излез“. А авторката на „Во војната и
љубовта“, Верица Митева овој пат запловува во сосема нови води со мрачната драма „Ја мразам мајка ми“. Сите домашни автори исто така ќе потпишуваат примероци и ќе се дружат со читателите на штандот на Сакам Книги на овогодинешниот Саем на книга.