Азербејџан, која е рангирана на дното за слобода на медиуми, им додели станови на 150 новинари во еден од станбените блокови во Баку. Сепак, голем дел од независните медиумски работници велат дека овој потег не значи и спријателување со претседателот Илхам Алиев.
Азербејџанскиот претседател Илхам Алиев свечено го отвори објектот на 22 јули, националниот празник на новинарите.
Во своето обраќање на настанот, претседателот говореше со пофални зборови за слободата на медиумите.
На табла поставена пред градбата е изгравирана изјавата на Алиев: „Чест ми е да сум пријател со новинарите“. Во своето обраќање, шефот на државата изјави дека во Азербејџан нема дискриминација во било која сфера.
-Интернет новинарството се развива низ целиот свет и во Азербејџан. Државата направи програми за зголемување на интернет пристапот и со тоа може да кажеме дека целосно ја подржуваме слободата на говор, рече претседателот.
Годинава Комитетот за заштита на новинарите побара од Азербејџан да го прекине притисокот врз новинарите. Според надзораната организација, новинарите во затвор отслужуваат казни на политичка основа.
Минатиот месец азербејџанскиот претседател потпиша указ на закон со кој се криминализира клеветата на интернет. Организации за слобода на медиуми го критикуваа потегот на државниот врв поради тоа што се стравува дека со законот ќе се замолчуваат критиките на независните новинари во пресрет на претседателските избори во октомври.
Меѓународната организација „Репортери без граници“ ја рангираше земјата на 156 место според слободата на печатот на ранг листа со 179 земји.