Европската пратеничка Ска Келер да се прогласи за персона нон грата на бугарска територија- ова е барањето на Валериј Симеонов, потпредседател на бугарската влада задолжен за економија и демографска политика и претседател на националистичката екстремна партија Национален фронт за спас на Бугарија (НФСБ).
Преку агресивно, навредливо па дури и вулгарно соопштение во балкански стил, Симеонов ја напаѓа германската пратеничка Ска Келер од групата на “Зелените” во Европскиот парламент и ја нарекува “зелен џихадист”.
И бара од бугарската влада веднаш да прати писмо до Европскиот парламент, до германската влада и до лидерите на Зелената европска партија поради “неприфатливо мешање во внатрешните работи на суверена Бугарија”.
Потоа следи навредливиот дел во кој Симеонов бара Келер да биде исфрлена од Бугарија и тоа кон турската граница:
“Министерот за надворешни работи мора да ја прогласи Ска Келер да персона нон грата и таа треба да биде исфрлена со камион кон Капикуле. Ние мислиме дека цената на авионскиот билет е не е заслужена во овој случај. Ако е потребно, НФЦБ со задоволство ќе и овозможи бесплатен превоз”.
Причината за агресивноста на Симеонов е учеството на Келер во протестот што се одржа на 8 февруари во Бугарија на кој учесниците бараа да се прекине со плановите за изградба на скијачки центар во Националниот парк Пирин.
Бугарските медиуми пишуваа дека сомневањата на Европскиот парламент за корупција во Бугарија ја доведоа германската пратеничка од “Зелените” Ска Келер која изјави дека намерата да се гради во Пирин будат сомнеж дека недостасува транспарентност во тендерите и јасни правила за сите.
Нејзината посета се должи и на извештајот за корупција во Бугарија. Според Келер, периодот во кој Бугарија претседава Советот на ЕУ е добар да се покаже вистинска борба против корупцијата во земјата.
Локацијата на Паркот Пирин што се наоѓа под заштита на европската програма Натура 2000 и под заштита на УНЕСКО уште од 1983 година. Но во 2010 година УНЕСКО одлучи да ги исклучи од својата заштита деловите на паркот што се наоѓаат над Банско и Добриниште бидејќи заклучи дека на овие локации имаат непоправливи штети поради урбанизацијата и развојот на скијачкиот центар.
Бугарските еколошки организации повеќе пати протестираа во последните години поради овој план за изградба на скијачки центар на Пирин.
Бугарската влада млако реагираше велејќи дека “ставот на НФСБ кон пратеничката Ска Келер не е став на бугарската влада. Владата на Република Бугарија е секогаш отворена на критики и го почитува правото на слободно изразување на личните ставови а слободата на изразувањето е запишана и гарантирана во Уставот”.
Според Даниел Кадик од фондацијата Фридрих Еберт:
“Познати ксенофоби, националисти и протекционисти ќе претседаваат со различни совети. На пример, таков е случајот со вицепремиерот Валери Симеонов, кој не ја крие својата омраза кон малцинствата, и Ромите јавно ги нарекува ‘диви мајмуни'”, пишуваше Дојче Веле на 1 јануари 2018 година кога Бугарија го презеде европското претседателство. Испад за кој Симеонов беше осуден во Бугарија.
Во текстот се цитира изјавата на екс претседателот на Европскиот парламент Ханс-Герт Петеринг кој се надева дека премиерот Борисов ќе може да го дисциплинира коалициониот партнер “за да може да продолжи со својот проевропски курс”.
Засега нема реакција од европските власти во Брисел на овој непристоен испад на Симеонов, виден член на бугарското претседателство со ЕУ.
Според францускиот новинар Никола Гро-Верхејде, испадот на Симеонов е, е метод на диктатура:
“Можеме да разговараме за политички ставови, да ги побиваме, да аргументираме. Но да се бара исфрлање на личност, поради нејзините ставови кои соодветствуваат на нејзината функција на европска пратеничка, е диктаторски а не демократски метод”, вели тој во неговиот влијателен блог.