Претседателот на Европската комисија, Жозе Мануел Баросо денеска ја критикуваше Русија во врска со ситуацијата на Крим, изјавувајки дека предлогот до Москва за директни преговори досега останал неодговорен.
Зборувајќи во Европскиот парламент во Стразбур, Баросо изјави дека Комисијата наскоро ќе издаде соопштение ќе биде побарано од Русија да се откаже од намерите за анексија на Крим. Тој повтори дека Брисел ќе воведе санкции доколку наскоро не почнат преговори на кои би се постигнал конкретен договор во одредено време.
Кримските локални власти соопштија дека делумно го затвораат воздушниот простор над Автономната кримска република со цел „да ги држат настрана провокаторите“ во пресрет на референдумот за приклучување кон Русија закажан за 16 март, јави ДПА.
– Ова е изборна мерка, што ќе биде повлечена по 17 март, изјави првиот вицепремиер на Крим Рустам Темиргалиев.
Темиргалиев не изнесе детали за ограничувањата, но на интернет страницата на аеродромот во Симферопол, единствениот цивилен аеродром на Крим, се наведуа дека се откажани сите авионски линии со Украина и Турција, додека летовите од и за Москва се извршуваат нормално.
Најавениот референдум за присоединување на Крим кон Русија претставува сериозна закана за европските граници, оцени денеска еврокомесарот за проширување Штефан Филе.
– ЕУ ги осудува условите за распишување и прашањата за референдумот, кој го сметаме за нелегален и нелегитимен, изјави Филе на седницата на Европскиот парламент во Стразбур.
Тој нагласи дека Унијата нема да ги признае резултатите од референдумот, за кои истакна дека „претставуваат сериозна закана за стабилноста на границите во Европа“.
Како што пренесува Франс прес, Американскиот Конгрес побарал од Русија веднаш да ги повлече своите војници од украинска територија и го повикал претседателот Барак Обама да воведе економски санкции кон Москва.