Нема вакцини против Хепатит Б за ревакцинација на бебињата од два и шест месеци. Одделите за вакцинација на деца се празни, потрошени се сите резерви со оваа вакцина која спаѓа во задолжителната вакцинација и за која следуваат казни до родителите доколку не ги вакцинираат децата. Вакцини нема и во приватните болници.
Во редакцијата на НОВА се јавија родители кои се пожалија дека веќе две недели чекаат да ги вакцинираат своите деца, но во службата за вакцинација им било кажано да се јавуваат секој ден и да прашуваат бидејќи не знаат кога ќе има вакцини.
„Веќе два месеци бараме вакцина, пробавме и во приватна болница но и таму ни река дека нема вакцини. Моето бебе на 30 ноември ќе направи два месеца и медицинската сестра ни објасни дека мора во тој рок да ја прими ревакцината, изјави за НОВА мајка на двомесечно бебе.
Според информациите на НОВА, во државата има недостиг и од други вакцини. Но, лекарите велат дека вакцината против Хепатит Б е најургентна.
Во поликлиниките во Скопје потврдија дека немаат вакцини веќе извесно време но, на одговор не упатија во Министерството за здравство кое врши централизирани набавки. Во службата за превентивна заштита при Министерството за здравство потврдија дека се потрошени сите залихи на вакцини бидејќи го чекаат новиот тендер за вакцини кој е при крај.
„Точно е дека нема вакцини за втора и трета ревакцинација, но за новороденчињата во породилиштата обезбедивме од првата доза да има до јануари идната година. Процедурата со тендерот е при крај, договорите се потпишани, а како ургентни следната недела ги очекуваме да пристигнат вакцините против Хепатит Б“ , изјави за НОВА, Јованка Костовска од Министерството за здравство.
Од Министерството велат дека тендерите се долги процедури и затоа целата работа е успорена. Количините на вакцини ќе стигнуваат континуирано, некои на 30, други на 60 дена, но приоритет ќе се даде на вакцините за Хепатит Б. Од таму не објаснија кои се вакцини недостасуваат во државата и зошто на време, планирано, не го распишале тендерот за децата да не останат без вакцини.
Со овој тендер се порачани и пет и шест валентните вакцини, кои од индната година ќе им се даваат на сите деца до две годишна возраст. Тоа се вакцини со кои со едно боцкање се ставаат пет или шест вакцини одеднаш, а не предизвикуваат бурни несакани реакции.
Сепак, овие вакцини во државата ќе стигнат во август 2015 година, бидејќи како што објаснија во Министерство, имало голема побаравачка за овие вакцини и затоа се чека толку многу.
Тендерот за вакцини министерот Тодорв го најави уште пред половина година. Зошто се чекаше децата да останат без вакцини не е познато.
Државата предвидува казни за оние родители кои нема да ги вакцинираат своите деца. Според законот тие што нема да ги вакцинираат децата плаќаат глоба од 300 до 650 евра, но ако родителите се јават на постапка на порамнување, казната се намалува за половина од овој износ.
НОВА пред два дена објави дека нема реагенси за многу важни испитувања на Институтите за имунологија и микробиологија. Како причина беа наведени новите измени на Законот за јавни набавки од мај годинава со кои за секоја јавна набавка треба да се добие одобрение од Советот за јавни набавки. Според познавачите на проблематиката токму новоформираниот Совет ја кочи процедурата бидејќи треба време додека се соберат членовите кои се од различни специјалности, а згора на се велат тие, Советот претставува непотребно административно оптоварување, и е голем трошок за буџетот.