Американскиот амбасадор Џес Бејли денеска реагираше на обвинувањата дека САД се обидуваат да ја поткопаат стабилноста на Македонија.
– Ние во Американската амбасада во Скопје често гледаме приказни во медиумите за теории на заговор и обвинувања дека САД се мешаат во домашните работи во Македонија и преземаат акции за дестабилизирање на земјата. Веруваме дека повеќето граѓани во Македонија, исто како и ние, ја препознаваат апсурдноста на ваквите приказни, се вели во соопштението, како одговор на обвинувањата за наводна инволвираност на нивни вработени и програми во ова.
– Ние сме многу отворени во однос на нашите програми и ангажман. Во последните 15 години, Американската Влада помогна со повеќе од 55 милиони долари за развој на капацитетите на македонските судови, судии, обвинители, адвокати на одбраната и на полицијата за тие да ја извршуваат својата работа професионално, транспарентно, ефикасно и со кредибилитет. Повеќе од 600 судии, 300 јавни обвинители, 150 адвокати на одбраната и повеќе од 2.000 припадници на силите за безбедност имаа корист од овие напори, истакнува амбасадорот Бејли, објаснувајќи ја досегашната поддршка на САД преку Амбасадата и соодветни програми за владеењето на правото во Македонија.
Според Бејли, актуелната политичка криза во Македонија поттикнала обвинувања за злоупотреба на власта и за можно криминално однесување, во комбинација со обвинувања за мешање на извршната во судската власт и во работата на обвинителствата.
Тој во писмената изјава потсетува дека лидерите на четирите најголеми политички партии во Македонија се согласиле, а Собранието едногласно прифатиле создавање на нова независна институција, Специјалното јавно обвинителство.
– Без разлика дали СЈО ќе биде успешно во спроведувањето на непречени, непартиски, како и професионални истраги со целосна поддршка од сите институции, тоа ќе биде вистински тест за владеењето на правото во оваа земја. Со оглед на клучната улога во воспоставување на правна одговорност, САД го поддржуваат СЈО со обука и со помош, исто како што им помагавме на македонскиот судски систем, Јавниот обвинител и на полицијата од независноста на Македонија. Овој ангажман е одраз на нашата длабока посветеност на владеењето на правото за да им помогнеме на луѓето во Македонија да се реши актуелната криза, да се развијат силни демократски институции и да се тргне напред кон членство во Европската Унија и во НАТО. Таа посветеност останува цврста, истакнува Бејли.
Москва пак денеска уште еднаш дека се огласи со став дека протестите на опозицијата во Македонија се доказ за подготовка за уште една „обоена револуција“ на Балканот.
Агенцијата ТАСС ја пренесе изјавата на портпаролот на руското Министерство за надворешни работи, Марија Захарова дека „се подготвува теренот за да се испровоцира уште една ’обоена револуција‘ овој пат во Македонија“.
– Ние нагласуваме дека практиката за немешање во внатрешните работи е со длабоки корени на Балканот. Искористени се добро разработените шеми на агресивното малцинство кое е платено од странство, изјавила Захарова.