Министерот за европска интеграција Фатмир Бесими смета дека меѓународната заедница треба да им помогне на Македонија и Грција да го решат спорот со името.
“Проблемот е билатерален но решението на спорот треба да биде мултилатерално и треба да ни се помогне да го решиме”, рече Бесими на конференцијата која денес во Брисел ја организираше Европскиот политички центар и која беше насловена Македонската европска иднина-перспективи и предизвици. Бесими рече дека верува во “висок политички дијалог помеѓу двете страни и улога на олеснувач на меѓународната заедница”.
Бесими не даде прецизен одговор на повеќе прашања што му беа поставувани за време на конференцијата и кои се интересираа за спорот за името и начинот како тој да се реши, за Скопје 2014 и дали овој проект е провокација за соседите или не, или за можноста да се распишат парламентарни избори наскоро.
Министерот инсистираше на тоа дека процесот за ЕУ интеграција е тежок пат кој има поддршка од 60 отсто од граѓаните и за кој сите во Македонија се спремни да ја платат цената. На прашањето која е цената што треба да се плати за тој пат, Бесими го релативизираше одговорот велејќи дека цената се реформите, но додаде дека “цената не е важна, важно е она што го добивате како слободата или повисокиот стандард”. Но не одговори на прашањето дали во Македонија има иницијативи за решавање на спорот и дали има провокативни активности кои ја спречуваат препораката за преговори на Европската комисија да се претвори во преговори со ЕУ.
Дописникот на франко-германската телевизија Арте го праша министерот дали Скопје наликува на “христијански Дизниленд” Бесими одговори дека тој, иако е либерален муслиман и Албанце, ја преставува целата земја и додаде дека Скопје 2014 година е прашање на вкус и архитектура која некому му се допаѓа а некому не. Тој самиот не кажа дали проектот е по негов вкус. Според него историјата е долга а културата разновидна па оттука овој проект е инклузивен. “Мораме да имаме конструктивност и зголемување на регионалната соработка а не провокации кон соседите”, рече Бесими.
На прашањето дали во Македонија ќе има попис тој рече дека оваа година тоа не е планирано. А неговиот одговор за тоа дали ќе има парламентарни избори исто така беше неодреден. Според него, во Македонија сега се работи на анализи, на реформи во земјата и на подготовката за претседателските избори.
Роза Балфур и Фатмир Бесими
Инаку, за време на конференцијата претставничката на ЕПЦ Роза Балфур, која го водеше настанот, како и најголемиот дел од учесниците, Македонија ја нарекуваа Македонија а не ПЈРМ. Сепак, претставникот на националната агенција МИА во Брисел при крајот на конференцијата интервенираше во дебатата барајќи од Балфур да не ја нарекува земјата како “Скопје”. Таа го потсети дека за целиот настан во повеќе наврати викала “Македонија” и “Скопје” а и самата најава на настанот, испратен до сите политички и дипломатски адреси во Брисел, го носеше насловот “Македонската европска иднина-перспективи и предизвици”.
Очигледно дека таа беше незадоволна од оваа забелешка па по прашањето на претставникот на МИА одлучи за нашата земја да ја употреби референцата “поранешна југословенска Република Македонија” ставајќи на знаење дека со ваков однос Македонија ги губи своите пријатели и создава непријатна атмосфера.