Безвременскиот Рацин инспирација за ВИ портрети

Кочо Рацин и денеска е инспирација. Неговите живот, неговото дело како поет, како политички и комунистички активист, борец за човекови права, социјална правда и за слобода, како вредности се еднакво значајни и актуелни и денес, во 21 век. Нашиот познат уметник и графички дизајнер, Небојша Гелевски, чија специјалност е компјутерската графика преку алатките на вештачката интелигенција (ВИ), беше инспириран да направи една серија портрети со ВИ што ви ги претставуваме во оваа негова статија.

Небојша ГЕЛЕВСКИ

Во оваа статија ќе објаснам како можеме да ја користиме вештачката интелигенција (ВИ) за да ја зголемиме базата на илустрации (фотографии) на македонските великани. Секогаш кога сакаме да креираме нова креативна содржина (есеј, презентација, статија, видео итн.) за личноста која оставила белег во Македонија се среќаваме со недостаток на фотографии, илустрации или слики, што е крајно обесхрабрувачки. На пример, за Кочо Рацин, на интернет циркулираат помалку од десет слики со неговиот лик. Со оваа иницијатива нудиме нови бесплатни портрети од нашите великани, достапни за слободно преземање. Оваа иницијативата ja започнаа Бранко Прља и Владимир Карер кои генерираа слики од Горан Стефановски, нивната цел беше „да ги поттикне нашите креативци да ги искористат алатките на вештачка интелигенција за повеќе вакви обиди за да се збогати и промовира нашето културно, уметничко, научно и интелектуално наследство кај нас и во светот“.

Како се генерира уметност со помош на вештачка интелигенција?

Најпознатите генератори на слики со помош на вештачка интелигенција се DALL·E 2, Midjourney, Stable Diffusion. Сите се јавно достапни на своите веб страници, сите можат да се испробаат бесплатно, ви треба само компјутер или мобилен телефон. За пофреквентна употреба на DALL·E 2 и Midjourney ќе морате да платите месечна членарина, додека Stable Diffusion е платформа со отворен код и беспатна за сите намени.

Како давам команда што сакам да се нацрта?

Замислете дека пред вас седи некој одличен сликар или илустратор кој ве прашува „Што би сакале да ви нацртам!?“, и вие му опишувате што сакате да ви нацрта, и тој ја исполнува вашата желба. Слично е и со овие платформи, вие треба на ВИ и „кажете“ што сакате да ви нацрта. Вашето барање го внесувате како текстуален опис (се вика Prompt) и тоа ВИ ќе го генерира за вас во визуелна форма за помалку од една минута. Во Prompt можете да внесете што сакате, вашата цел е ВИ да разбере што навистина сакате.

Наједноставен пример за Prompt би бил: „Нацртај ми портрет на Мајка Тереза во стилот на уметноста на Енди Ворхол“ (се разбира, сега за сега, промптовите ги пишуваме на англиски јазик). По притискање копчето „генерирај“, платформата генерира визуелна интерпретација на тоа што сте го побарале, користејќи го своето „знаење“, „визуелна меморија“ и архива. За среќа, ВИ знае која e и како изгледала Мајка Тереза, го познава уметничкиот опус на Енди Ворхол и резултатите ќе бидат одлични. Пробајте!

Дали ВИ знае како изгледаат сите македонските великани, како на пример Кочо Рацин? За жал не знаат! Ако напишете промпт „Нацртај ми портрет на Кочо Рацин“, резултатите се цртежи и фотографии од некои луѓе кои воопшто не личат на наш Рацин.

Како направив ВИ модел од Кочо Рацин?

Со цел да ја тренирам ВИ за да го препознава Рацин, морав да создадам модел кој во себе ќе направи дигитална база за изгледот на Рацин. Процедурата е детално опишана од јутјуберот Aitrepreneur, кој се бави со вештачка интелигенција и нејзина употреба, го препорачувам целиот негов канал, ако ве интересира оваа „нова технологија“.

Конкретно го следев следното видео упатство: DREAMBOOTH: Train MULTIPLE Subjects In Stable Diffusion At The Same Time For FREE!.

Инсталација на ВИ генератор на слики локално на вашиот компјутер

За да си го олеснам процесот на генерирање слики со ВИ решив да инсталирам Stable Diffusion на локален компјутер. На истиот YouTube канал најдов одлично упатство како да подигнеш локален сервер на својот компјутер и да добиеш супер верзија од генераторот Stable Diffusion, користејќи го хардверот од својот компјутер… повелете линкот до супер-упатството. Со оваа инсталација добивате генератор на слики како локална апликација, брзината е поголема, не сте зависни од надворешни сервиси, потполно бесплатна, единствен проблем е што морате да имате моќна графичка картичка.

Како бирав како да изгледа „новиот Кочо Рацин“?

Како промптови за Кочо Рацин, користев „Portrait of Koco Racin…“ па после ставав разноразни стилови, како на пример „ retro ads, vector style, manga style, classical portrait, avangarda poster, cinematic, futuristic и други познати уметници и уметнички стилови. Вкупно генерирав преку 1000 различни ВИ интерпретации на Рацин. Погледнете ги ВИ верзиите и на Гоце Делчев и на Блаже Конески.

Повелете избор од најдобрите верзии од Рацин, слободни за употреба, за лични и комерцијални цели, би замолил да ме наведувате како извор, како на пример (Извор: Небојша Гелевски – Бане).