Локални жители и активисти денеска од 5 часот повторно се собрани заедно да го блокираат пристапот до рудникот Иловица, каде изминатава недела се вршеа археолошки истражувања, објави Радио МОФ.
-Пријатели, сограѓани, жители од Струмичката околина, вториот ден од блокадите повторно успешен, мирните блокади повторно го спречија ‘Еуромакс’ своеволно да ни ја окупира природата. Уште еднаш срцето и совеста се покажаа повредни од парите – желбата за здравје, сигурен и мирен живот втемелена кај нашите сограѓани излезе во прв план. Јасно им ставивме до знаење дека парите можат да си ги земат со себе и слободно да уживаат со нив некаде далеку од нас, а ние ќе останеме овде и ќе се сладиме на убавината дадена од природата, ќе уживаме во чистиот воздух, ладните сенки на прекрасната Огражден и милозвучниот шум на благородните речни извори-, соопштија денес активистите од Младите на Иловица-Штука против рудникот.
Активисти од граѓански организации заедно со жители од Иловица и Штука со жив ѕид и моторни возила од вчера почнаа со блокади на патот до рудникот „Иловица-Штука“ на планината Огражден.
Граѓанското здружение „Здрава Котлина“ на социјалните мрежи соопшти дека со овој потег „започнува нова фаза“ на нивната борба против актвностите на концесионерот за рудникот „Еуромакс Рисорсис“, кој како што наведуваат, веќе три години оперира со истечена концесија.
-Денес го спроведуваме на дело она што подолго време го зборуваме и за кое предупредуваме дека нема да дозволиме никому, по ниту една цена, никогаш да има рудник над нашите глави, соопштија од „Здрава Котлина.“
Тие ги предупредуваат „Еуромакс Рисорсис“ да ја разберат пораката и бараат Владата во најскоро време да донесе решение и „согласно законите“ да ја одземе концесијата на компанијата за рудникот.
Од грѓанската организација „Еко-долина“ велат дека сомневањата во објективноста на археолозите од Музејот во Струмица, се поради тоа што дошле да ги прават истражувањата на терен облечени во облека со логото на „Еуромакс Рисорсис“, како и со возила донирани компанијата. Активистите наведуваат дека блокадите нема да престанат додека не и биде одземена „истечената концесија на Еуромакс“.
Активностите продолжуваат утре во 5 часот, а збирно место е браната Иловица.