Откако јавноста беше шокирана со смртта на родилката и нејзиното бебе кои биле под опсервација на пијани анестезиолози, смрт на уште дена трудница и девојче, а опозицијата побара оставка од министерот Тодоров, во медиумите започнаа оркестрирано да пристигнуваат писма од болници и поединци во кои се фалат реформите.
И покрај тоа што тонат во долгови за лекови, медицински материјал, за режиски трошоци, парно, струја вода поради малите буџети, менаџерите на болниците потенцираат колку е подигнат квалитетот на услугите во нивните болници и што се направил Тодоров од неговото назначување за министер.
Прво се појави писмо од Виктор Камиловски, хирургот од Градската хируршка болница, близок до владеачката партија, каде што тој вели дека нападите врз министерот се паушлани и навреда за бројниот медицински персонал.
„Во овие моменти треба сите здравствени работници да бидеме сплотени и да дадеме максимална поддршка на првиот, еднаков меѓу нас – Министерот за здравство, Никола Тодоров, како и целокупниот негов тим“, им сугерира на своите колеги Камиловски.
Веднаш по него се појави писмо од Градската општа болница „8 Септември“ каде менаџментот и се обраќа на јавноста и при тоа објаснува каква опрема е набавена за болницата, како и дека се прaќаат доктори на едукација во странство.
„Веруваме дека во здравствените установи постојат изолирани случаи на неодговорни доктори, меѓутоа не треба според нив да се цени квалитетот на здравството во целина. Не треба да се заборави напредокот постигнат во здравството во изминатиот период, се вели во писмото на Менаџментот на болницата.
Речиси во исто време до сите медиуми во државата стигнаа писма од менаџменотот на болницата во Велес и доктор Светлана Темелковска, специјалист радиолог , носител на проектот за скрининг на рано откривање на рак на дојка. Во дел од своето образлагање за реформите на министерот Тодоров менаџменотот на велешката болница вели:
„Од именувањето на министерот за здравство Никола Тодоров, па до ден денес во ЈЗУ Општа Болница Велес има значајни промени генерално во функционирањето и работењето на болницата, а се со цел укажување на квалитетна и навремена зравствена заштита на пациентите и подобрување на условите за работа на вработените“, стои во писмото од болницата во Велес.
Во емотивното писмо од радиологот Светлана Темелковска, докторка со долгогодишно искуство во својата област, се вели дека жали за случајот со родилката во Гевгелија и дека мора да се најде конструктивен начин и решение како вакво нешто никогаш веќе да не се случи. Во понатамошниот текст набројува што се е направено и кои апарати се купени за рано откривање на рак на дојка.
„Овој бел мантил и ова министерство и тимот во „Мој термин„ направи огромен чекор напред за рано откривање на рак на дојка како најчесто малигно заболување кај жената“, вели во своето писмо, Темелковска.
Истите тези денеска ги бранеше и премиерот Груевски на седницата за пратенички прашања, каде опозициската пратеничка Рената Дескоска го праша дали ќе понесе морална одговорност, по смртта на двете родилки изминава недела и дали ќе го разреши министерот за здравство Никола Тодоров.
Груевски одговори е дека најлесно е да впери прстот кон министерот, но според него, политичарите не утврдуваат кој е виновен, туку институцииите ќе покажат дали несреќните случаи се резултат на лекарски грешки или не.