По никаков начин не можам да ве засакам, со целото малтретирање и рекет врз нас, апсевте, приведувавте, уништувавте, вклучително и денеска и вчера продолжувате да ги повикувате луѓето и да ги прашувате за кого гласале. Направете влада, преземете одговорност, управувањето со земјата не е шоу, изјави на брифинг лидерот на ГЕРБ, Бојко Борисов.
-Веднаш ќе го вратиме мандатот доколку ни биде даден. ГЕРБ ќе биде силна опозиција. Формирајте си Влада и работете, рече Борисов.
Тој повторно упати критики до Слави Трифонов и членовите на „Има таков народ“. За ситуацијата обвинуваше и други политичари како што е Христо Иванов, претседателот на „Демократска Бугарија“.
-Ако има некаде пад од милиони гласови, тоа е кај Слави Трифонов. Тој секој ден кажуваше дека 2,5 милиони луѓе го поддржале на референдумот, а на 11 јули тие станаа 600 илјади, рече Борисов, додавајќи дека Трифонов го правел составот на новата Влада по „фенг-шуи“.
Во однос на расправиите за тоа дали и која партија во Собранието би го поддржала предлогот за Влада на Слави Трифонов, Борисов одговори дека допрва очекува караници, истакнувајќи дека дури и да се качат на Месечината политичарите би се скарале кој да завладее таму.
-Замислете, кога ќе стапнат на Месечината Бугарите и Македонецот, кој ќе стапне прв? Кој ќе завладее? Замислете каква борба ќе настане за тоа кој ќе стапне прв, а сега очекувате да ви одговорам дали ќе се договорат… Треба да си понесат одговорност, заклучи Борисов.