угарскиот премиер Бојко Борисов очекува наредната година кога ќе се навршат 150 години од раѓањето на Гоце Делчев, тоа да го одбележи со „браќата од Северна Македонија“.
Изјавата тој ја дава по повод 149 годишнината од раѓањето на Делчев, која се одбележува денеска.
„Денеска се одбележува 149-годишнината од раѓањето на Гоце Делчев – војвода, деец на македонско-одринското ослободително движење, еден од нашите најистакнати херои на историјата. Се наведам дека ќе бидеме мудри, следната година заедно со нашите пријатели браќа од Северна Македонија да ја прославиме 150-годишнината, обединети и заедно на патот на европската интеграција“, вели Борисов во изјава за БГНЕС.
По повод 149-годишнината од раѓањето на Делчев, премиерот Зоран Заев, пак, се огласи на социјалните мрежи пишувајќи дека денеска се сеќаваме и оддаваме почит на неговиот историски придонес во создавањето на македонската државност.
„Како инспиратор и двигател на македонската револуционерна организација, Гоце Делчев секогаш повикуваше на единство и сплотеност во политичките предизвици пред кои е исправена земјата од сите општествени чинители и граѓани, без разлика на нивната верска, етничка или политичка припадност. Идеалите и заложбите на овој великан се наша заедничка обврска да продолжиме да ја градиме државата како демократска и економски напредна земја, која денеска е дел од најмоќниот воено-безбедносен сојуз НАТО и земја која чекори кон членство во ЕУ“, напиша Заев.
