Европските претставници бараат до крајот на неделава македонските лидери да најдат компромис за излез од политичката криза. Оваа порака денеска му е пренесена на новиот вицепремиер за евроинтеграции Фатмир Бесими на неговата прва посета на Брисел.
– Ситуацијата во Македонија е навистина драматична, со овие зборови Бесими бил пречекал од еврокомесарот за проширување Штефан Филе и му кажал дека доколку политичките лидери не покажат зрелост нема да биде исполнет политичкиот критериум за добиување датум за преговори со Европската унија, пренесува Телма.
-Пораката на Филе е јасна и неговиот став е искажан вчера од страна на канцеларијата на ЕУ во Скопје. Комесарот пренесе дека моменталната политичка состојба во Македонија предизвикува и исполнување на еден од Копенхашките критериуми, посебно во однос на зрелоста на политичките институции, што е исклучително важно за напредок во евроинтеграциите. Тоа што останува е ние да останеме посветени на реформската агенда и сите политички актери во Република Македонија да се фокусираат на државниот интерес и интересот на граѓаните, а тоа е Македонија да напредува на патеката на европската интеграција, изјави Бесими.
Известувачот за Македонија во Европскиот парламент Ричард Ховит на средбата со Бесими најави дека утре ќе дојде во Скопје доколку во меѓувреме не дојде до некаков пресврт меѓу главните политички чинители во Македонија.