Џанлуиџи Буфон не сака да се повлече од фудбалот без трофеј во Лигата на шампиони (ЛШ), единствениот што му недостасува во кариерата. Убеден е дека ќе успее да го подигне „пехарот со уши“ веќе наредната сезона со екипата на Јувентус.
„Имам уште една година од договорот што значи и нова шанса. Знам дека ќе биде многу тешко. Свесен за тоа. Пропуштивме прекрасна прилика за која многу жалам“, истакна легендарниот голман на „старата дама“ и италијанската репрезентација.
Јувентус ја заврши сезона со шесто Скудето во низа во Серија и трета двојна круна едноподруго во италијанската фудбалска сцена. Но, „бјанконерите“ доживеаја дебакл во мечот за титулата во ЛШ во Кардиф. Убедливиот пораз од Реал М. (1:4) е трет за Буфон во настапите во финалните мечеви, петти во низа за екипата и вкупно седми во нејзината историја.