Бугарското министерство за економија и енергетика нареди да се прекинат сите активности поврзани со изградбата на гасоводот „Јужен тек“, додека проектот не се усогласи со барањата на Европската комисија.
Во писмото до Бугарскиот енергетски холдинг (БЕХ), потпишано од министерот за економија Васил Штонов, забрането е потпишување на било какви договори во врска со „Јужен тек“, а од БЕХ се бара да и помогне на ЕК при усогласувањето на овој проект со правната регулатива на Европската унија (ЕУ), пренесува ИТАР-ТАСС.
Штонов минатата недела изјави дека проектот „Јужен тек“ ќе биде реализиран, бидејќи е важен и за Бугарија и за Русија, но и за целата ЕУ. Бугарскиот министер сепак нагласил дека сите страни кои се вклучени во проектот, мораат да сфатат дека тој мора да биде реализиран по прописите на Унијата.
Тој изразил очекување дека во следните два месеци ќе биде постигнат напредок, доколку ЕК и Русија седнат да преговараат и да работат заеднички.
Сепак, како земја-членка на ЕУ Бугарија се најде под засилен притисок од Брисел да ги прекине работите на гасоводот затоа што тој не е во согласност со европските прописи. Во текот на јуни бугарската Влада ги замрзна активностите на изградба на гасоводот, но во јули сменетата министерка за развој Десислава Терзиева сепак одобри почеток на прелиминарните работи кај терминалот Паша Дере. Сегашната влада сепак избра да ги следи препораките од Брисел.
Вкупната вредност на проектот Јужен тек се проценува на околу 16 милијарди евра, а со комерцијална работа требаше да започне кон крајот на 2015 година.