Властите во Софија се лути по објавениот извештај на словенечкиот Меѓународен институт за блискоисточни и балкански студии ИФИМЕС од Љубљана. Министерството за надворешни работи на Бугарија денеска соопшти дека ќе го повика привремениот амбасадор на Македонија да даде објаснувања дали Владата во Скопје е поврзана со кампања спроведена преку овој институт.
Имено, пред неколку денови ИФИМЕС објави дека бугарските власти пласираат неверодостојни податоци дека Македонците имаат бугарско потекло и оти Северна Македонија мора да даде официјална изјава дека македонскиот јазик и идентитет имаат бугарски корени.
„Не може да се замисли дека во 21 век, државата Бугарија, која е полноправна членка на ЕУ и НАТО, ги оспорува идентитетот и јазикот на соседниот македонски народ“, коментираше словенечкиот Институт додавајќи дека бројот на етнички Македонци што живеат во Бугарија е околу 10 проценти од вкупното население на таа земја.
„Ние Бугарите не сме „Богомили, Турци и Бугаризирани Македонци. Ние сме горди деца на Мајка Бугарија, чија историја е стара над 1300 години“, напиша претседателот на ВМРО, Красимир Каракачанов на неговиот профил на Фејсбук по текстот на словенечкиот „Меѓународен институт за Средноисточни и балкански студии“ ИФИМЕС. Ова го соопшти прес-службата на партијата.
Изданието зборува за фактот дека Бугарија е „грдото лице на ЕУ“ поради нејзиното категорично барање во врска со правилата за продолжување на преговорите за членство на РС Македонија во ЕУ. Во студијата се вели дека Независна Бугарија е создадена врз основа на договорот меѓу Руската Империја и Отоманската империја, т.е. Сан Стефанскиот договор од 1878 година. На територијата на Бугарија во тоа време живееле главно богомилско, македонско и турско население, кои подоцна биле насилно бугаризирани под силниот притисок на новосоздадената држава.
Според Каракачанов, целта на овие публикации е да се наруши имиџот на Бугарија, бугарскиот народ и бугарската историја што е можно повеќе.
„Сега гледаме директни докази дека зад оваа медиумска кампања не стои никој друг туку македонската влада и лично премиерот Заев, преку неговите советници кои ја водат оваа лобистичко-рекетарска структура наречена институт“, возврати Каракачанов.
„Не еден, не двајца, туку тројца советници на премиерот Заев се водачи на овој лобистички институт, со седиште во Љубљана, кој со години исфрла оган и сулфур против Бугарија. Во нивното последно издание, Бугарија е претставена како грдо лице на Европа. Бугарија нема Бугари, само Богомили, Турци и насилно бугаризирани Македонци. Исто така, за нив канцеларката Меркел е глава на балканската мафија во ЕУ и има носталгија кон нацизмот и Адолф Хитлер. Ќе застанам тука… “, напиша тој.
„Веќе со години велам дека Скопје, без оглед кој е на власт – Груевски или Заев, спроведува агресивна антибугарска кампања и во самата Македонија против тамошните Бугари, и со платено лобирање и публикации во западните медиуми и невладини организации. Овие публикации треба да го нарушат имиџот на Бугарија, бугарскиот народ и бугарската историја што е можно повеќе“, додаде Каракачанов.
Сепак, нашите „пријатели“ во Скопје забораваат дека бугарскиот народ не пасе трева! Овие трикови, наследени од Титова Југославија, не можат да поминат, другари и другарки. Сакам да ви кажам да знаете дека додека сум јас, како и додека постои ВМРО и сигурен сум дека сè додека има Бугари во Бугарија, вашата омраза кон сè што е бугарско, комбинирана со комплексна дрскост и лицемерие, никогаш нема да биде во ЕУ“, додаде Красимир Каракачанов.