„Еден од најважните критериуми за пристапување во ЕУ е и висок стандард на демократијата. Демократијата подразбира и постојан дијалог меѓу опозицијата и власта. Таков дијалог треба да има и во Парламентот и тој треба да продолжи. Отсуството на опозицијата од Парламентот е секако неприфатливо “, изјави европратеникот Јиржи Бузек.
Европратениците Јержи Бузек, Туне Келам, Мирослав Миколашик и Ласло Токеш на средбата со Македонскиот министер за надворешни работи Никола Попоски потенцираа дека земјата мора да се демонстрира внатрешно единство.
„Македонија е добро подготвена и направи одлични работи во процесот за пристапување кон ЕУ. Посочувајќи на естонското искуство на патот кон ЕУ дека она што и помогнало на земјата да ја оствари својата национална цел е силно изграденото национално чувство за единство“, рече Туне Келам.
„Тука сме за да го забрзаме процесот на почеток на преговори. Како што веќе истакна Европскиот парламент прашањето за името не смее да биде пречка за да се започнат преговорите за членство. Она што е битно да го демонстрирате сега е внатрешно единство“, рече Келам.
Посетата на европратениците на земјава се одвива на само десетина дена пред Европски парламент да расправа за новата Предлог резолуција за Македонија.