Директорот на ЈП Паркинзи Центар, Саша Богдановиќ, по донесената одлука од Советот за бесплатен паркинг за жителите на општина Центар, упати повик до граѓаните кои треба да поднесат барање за добивање на повластени паркинг карти да склучат нов или да го обвноат постоечкиот договор.
Директорот Богдановиќ, исто така, ја обвини власта дека таа не сака жителите на Центар да ги користат овие повластувања и дека градот Скопје најавува одземање на дел од општинските паркинзи.
„За жал власта не сака изгледа жителите на Центар да ја користат оваа повластица. Па затоа во истиот ден кога започна седницата на Советот добив писмо од Јавното претпијатие за паркинзи, сопственост на град Скопје, со кое ни најавуваат дека сакаат да ни преземат дел од општинските паркинзи, и на тие паркинзи да се наплаќа на сите, вклучувајќи ги и жителите на Центар.Се работи за паркинзите во Дебар Маало, Буњаковец, Дом на градежници“, рече Богдановиќ..
Според него, ова барање немало логика, бидејќи сите улици ги одржува општина Центар, а за нив граѓаните на општина Центар плаќаат комуналии.
„ Сакам да ги повикам жителите на Општина Центар со потписи и со петиција да не им дозволиме на ЈП “Градски паркинг“ и понатаму да ги узурпираат овие површини за да наплаќаат паркирање и да го полнат буџетот на Градот Скопје“, рече Богдановиќ.
Утре во 10 часот наутро продолжува седницата на Советот на општина Центар која по 20 часа расправа вчера утрото беше прекината.