Вработените од Центарот за дијализа во Струга не сакаат нивната здравствена установа да биде дадена под концесија бидејќи се покажало дека ваквото функционирање има добри резулати јавува МИА.
Тие побарале од министерот за здравство Никола Тодоров да не потпишува договор со компанијата која доби лиценца за вршење здравствена дејност за дијализа во Заводот за нефрологија, посочувајќи дека таа здравствената установа е многу повеќе од третманот за дијализа и е во интерес на бубрежно болните.
– Бараме средба со министерот Тодоров, каде со аргументи стручно ќе докажеме дека оваа специјална болница е многу повеќе отколку самиот процес на дијализа кој трае четири часа, истакна Муса Асим член на стручниот колегиум.
Во име на сите вработени тој потенцира дека лекувањето со дијализа е само дел во згрижувањето и третманот на бубрежните болни, на кои им претходат други испитувања во текот на комплетниот третман.
– Комплетниот третман на еден бубрежно болен почнува со раното дијагностицирање на заболувањето, а токму тоа го врши нашата установа преку Кабинетот за хипертензија и кабинетите за Ехо дијагностика, бренд познат во државата. Педесет проценти од вкупниот број бубрежно болни во земјата почнуваат лекување со хемодијализа токму во нашата установа, нагласи Асим.
Апелот на вработените следи откако подолг временски период не добиле одговор на нивното писмо каде бараат средба со Тодоров.
На јавното надавање во Министертвото за здравство за регионот на Струга доби компанијата Орка Холдинг АД Скопје која ќе стопанисува со дијализата во наредните 20 години.