Чешкиот претседател Милош Земан не се согласува со руска воена интервенција во Украина, соопшти неговиот портпарол Јиржи Овчачек.
Според Земан, како што јави дописникот на МИА од Прага воената интервенција во Украина би „создала длабок ров, кој со генерации нема да може да биде покриен“.
-И иако јас целосно ги разбирам интересите на мнозинството на рускојазичното населението на Крим, кој во 1954 со бесмислена одлука на Хрушчов беше припоен кон Украина, ние имаме искуства со воената интервенција во 1968 година. И јас верувам дека каква било воена интервенција ќе создаде длабок ров кој со генерации нема да може да биде покриен, смета Земан.
Полуостровот Крим, каде околу 58 проценти од околу два милиони жители се Руси, во 1954 година бил подарен на Украина од страна на тогашниот советски лидер Никита Хрушчов. Во моментов таму постои зголемена тензија и закани за отцепување од Украина и припојување кон Русија.
Загриженоста околу таквата ситуација изрази и чешкото Министерство за надворешни работи, кое ја потенцираше потребата од зачувување на територијалниот интегритет на Украина и почитување на нејзиниот суверенитет и границите. Министерството, истовремено изрази поддршка за напорите на новата украинска влада за смирување и стабилизирање на ситуацијата во земјата.
Чешкиот премиер Бохуслав Соботка во изјава за медиумите оцени дека ниту една земја не би требало да употреби воена интервенција во внатрешните работи на Украина.
-Јас цврсто верувам дека територијалниот интегритет на Украина не е загрозен, бидејќи тоа би бил дестабилизирачки елемент за целиот регион кој без сомнение би предизвикал негативни последици за животниот стандард и економијата на Украина, рече Соботка.