Цела Чешка денеска се смее на премиерот Јуриј Руснок и на неговите министри во Владата, кои незнаејќи дека микрофонот пред нив е вклучен разговарале како да избегнат да одат на погреб на Нелсон Мандела.
-Човеку, сега уште и Мандела умре.Се надевам дека претседателот ќе оди на погреб. Човеку, само јас да не одам, се жалел премиерот во оставка на министерот за одбрана, Властимир Пуцек, пишува порталот ihned.cz но и сите останати медиуми во Чешка.
За премиерот Руснок, Јужноафричката Република била многу далеку и не можел да се утеши со фактот дека ќе оди со воен авион на трошок на Министерството за одбрана.
-Ужас, се надевам дека Милош ќе може да патува, но се надевам дека лекарите нема да му дозволат, рекол во паника Руснок. Тој алудирал на тоа дека претседателот Земан има проблеми со коленото и заради тоа ги откажал сите патувања во странство.
-А, како тој ќе се качи во авион? Го прашал министерот за одбрана премиерот, додека министерот за финансии додал дека претседателот Земан има проблеми со качување по скалите, алудирајќи на шпекулациите дека тој има проблем со алкохолот, а не со коленото.