Денеска по повод големиот македонски празник 11 Октомври пристигнаа бројни честитки од државниот и политичкиот врв на земјава.
Премиерот Димитар Ковачевски вели дека денес го чествуваме почетокот на антифашистичкото востание и на Народноослободителната борба кога 1941-та, нашите херои, борците од НОБ, храбро и обединето ја избраа вистинската страна на слободата, правдата, прогресот борејќи се за слободарскиот идеал и мир.
„Победничкото антифашистичко народноослободително движење, на првото заседание на АСНОМ го официјализира и идеалот за македонската држава и ние како граѓани, сме вечно благодарни. Го продолжуваме нивниот пат во истата насока, избирајќи го напредокот и мирот на државата и создавајќи подобар живот за сегашните и идните генерации“, вели премиерот во честитката.
Претседателот на Собранието Талат Џафери, порача дека 11 Октомври – Денот на Народното востание е историски ден кога се потсетуваме на одлучната борба против фашизмот – најголемото зло во историјата. Тогашните борци, вели тој, биле уверени, како што сме и ние сега во ова турбулентно време на војна во Украина, и на општа неизвесност во поглед на привидниот мир во светот уверени, за тоа каде да ја дадеме нашата институционална, политичка, материјална и морална поддршка. „Затоа, сплотени и единствени како граѓани, никогаш да не заборавиме да бидеме на вистинската, исправна страна, и заедно да градиме стабилна и сигурна иднина за идните поколенија“, додава Џафери.
Претседателот Стево Пендаровски истакна дека и денес после 81 година од почетокот на антифашистичката борба која ни донесе слобода и македонска држава, заедно со целото човештво сме исправени пред нови искушенија. „Како што излегувајќи во партизани, зад слободарскиот бајрак, застанаа левичари и десничари, Македонци и припадници на останатите националности, селани, работници, еснафи и поимотни, така и сега треба да се сплотиме и заеднички да се соочиме со проблемите“, порача тој.
Опозицискиот лидер Христијан Мицкоски рече дека овој празник е еден од најсветлите датуми во македонската историја, затоа што значеше почеток на едно антифашистичко востание на македонскиот народ, кое беше крунисано со АСНОМ и втемелувањето на македонската државност. „Тоа е нашето свето антифашистичко наследство на кое сите граѓани на Македонија треба да се гордеат, затоа што застанале на вистинската страна на историјата и на тој начин го оствариле вековниот стремеж на илјадници други знајни и незнајни јунаци за слободна Македонија“, истакнува тој во честитката.