Претставниците на ЕУ сè уште не постигнаа договор за предложеното ембарго против руската нафта, но се очекува да се приближат до договор на состанокот утре, пренесе пред малку Ројтерс цитирајќи извор од учесници во разговорите.
Претставниците од земјите на ЕУ денеска ја имаа првата дискусија за предлогот, според изворот, кој рече дека состанокот завршил без формална поддршка за планот.
Унгарија, Словачка, Чешка и Бугарија изразија загриженост за ембаргото за нафта, рече изворот, истакнувајќи дека договор може да се постигне на новиот состанок на пратениците утре.
Во меѓувреме, заменик-премиерот на Бугарија, Асен Василев, рече дека неговата земја ќе бара изземање доколку ЕУ се согласи да дозволи исклучоци за какво било ембарго на руската нафта. Тој во интервју за финансискиот весник Капитал рече:
„Бугарија, технолошки, може без руска нафта, но тоа значително ќе ги зголеми цените на горивото. Значи, ако Европската комисија размислува за исклучоци, ние би сакале да ги искористиме таквите исклучоци“.