„Ирационален човек“ на Вуди Ален, „Таткото“ на Висар Морина, кој меѓу останатите, ја доби наградата за најдобар режисер на Меѓународниот филмски фестивал во Карлови вари, работилницата со проф. Берак Таранч за вечната поврзаност на музиката и филмот, односно како инструментите, ритамот, мелодијата и хармонијата влијаат врз процесот на пишување сценарија и концерт на „Летечки Пекинезери“ е дел од она што „Хотел Синедејс“ го нуди во рамките на денешната програма.
„Ирационален човек“ ќе се емитува во кино Милениум во 20 часот. Ема Стоун, Жоакин Феникс, Вуди Ален се дел од филмот кој е приказна за професорот по филозофија Ејб Лукас.
Во 22 часот активноста во Милениум продолжува со „Ајзенштајн во Гуанахуато“, филм на Питер Гринвеј. Овој филм се случува во 1931 година, и е приказна за советскиот режисер Сергеј Ајзенштајн. Во екот на неговата уметничка моќ тој патува за Мексико за да го сними својот нов филм „Да живее Мексико“, откако претходно е одбиен од страна на Холивуд и е под огромен притисок да се врати во сталинистичка Русија.
Во киното Фросина се предвидени неколку проекции за денес, меѓу кои: во 12 часот „Валкани слатки работи“, во 19 часот „Хемотерапија“, во 21 часот „Кучешко срце“ а во 22:30 филмот „Таткото“.
Филмот „Ага Јусеф“ е дел од ревијата ирански филмови и е приказна за Ага Јусеф кој живее со ќерката единица и прави сѐ за да ѝ пружи подобар живот, надевајќи се дека вечно ќе остане негова. Овој филм е предвиден за во 18 часот во Џебно кино.
Во 20 часот пак, предвиден е филмот „Обс – Сингапурска приказна“,музички документарен филм што се враќа низ времето за да стигне до креативниот процес на бендот The Observatory и неговите првобитни членови.
Во 22 часот, програмата на Џебно кино продолжува со „Љубов и Гнев“, филм составен од 5 дела (Рамнодушност, Агонија, Секвенција на хартиениот цвет, Љубов и Дискутираме, разговараме). Во него режираат Пјер Паоло Пазолини, Бернардо Бертолучи, Жан Лук Годар, Маури Болонини, Мако Белочио и Карло Лизани.
Програмата завршува со журката на македонскиот џез бенд Летечки Пекинезери во МКЦ во 22:30 часот. Влезот за нив е слободен.