Партијата на европската левица ќе го кандидира лидерот на грчката Коалиција на радикалната левица (Сириза), Алексис Ципрас за претседател на Европската комисија.
Како што јави Радио Атина, одлуката за номинацијата на Ципрас ќе биде официјално потврдена на 4-от Конгрес на Европската левица, што ќе се одржи од 13 до 15 декември во Мадрид.
Партијата на европската левица обединува 40-тина партии со социјалистичка, комунистичка и еколошка ориентација од Европа.
Инаку, како што објавија дел од европските медиуми, има уште многу време пред да биде обелоденето името на следниот претседател на Европската комисија, но лидерите на ЕУ веќе размислуваат за тоа.
За ова прашање неформално ќе се дискутира на маргините на самитот на ЕУ, што ќе се одржи на 24-25 октомври.