Набљудувачите и активистите од работните групи за превенција на ЦИВИЛ и денеска, на денот на гласањето во вториот круг на Локалните избори 2013, регистрираа повеќе случаи на нерегуларности и инциденти во повеќето општини каде што има втор круг или прегласување, информираат за НОВА.
До пладне, во Цивил стасале следните информации:
„Во Велес, набљудувачка на Цивил акредитирана од ДИК и со уреден документ од Цивил е спречена да влезе на избирачкото место 2147.
Нагласачкото место 2164 регистриран е обид за фотографирање. Во оваа општина, набљудувачи на невладината Платформа за сиромаштија се отстранети од зградата со полиција, за подоцна да им биде овозможенпристап до гласачките места.
Забележани се партиски активисти на одредена партија кои стојат пред избирачките места и вршат притисок врз гласачите.
Обид за фотографирање на гласачкото ливче е регистриран и во Ѓорче Петров на гласачкото место 2556.
Во општините Ѓ. Петров, Аеродром и Карпош во Скопје, како и во Тетово се забележува кршење на изборниот молк со дистрибуција на флаери во полза на одредени партии, односно кандидати.
Во Струмица, нашите набљудувачи ни јавуваат за силно присуство на полицијата и тензична атмосфера. Како што е познато, утринава во Струмица е скршена една избирачка кутија и имаше истрели од пиштол-плашливец.
Во Карпош, на гласчкото место број 2593 е регистриран случај на починато лице заведено во избирачкиот список. Истото лице било на списокот и во првиот круг на гласањето.
Во општина Центар, во Капиштец регистрирано е јавно прозивање на гласачите.
Особено тензична атмосфера е регистрирана во Кочани каде што многу видливо присуството на полицијата, особено по синоќешните апсења за кои се тврди дека се припадници на одредена политичка партија. Забележан е и зголемен број на гласачи со придружба.
Во општина Чаир, партиски активисти внатре во избирачките места имаат листи и ги евидентираат гласачи, а има и случаи на гласање со непревиткани ливчиња (гласачко место 2945).
Од Тетово доаѓа информација за активисти на одредена партија кои пред ОУ Кирил и Методиј нуделе пари за гласови.
Наша набљудувачка на гласачкото место 1020 во Куманово беше под притисок на партиски активист на одредена партија да не прибира белешки и изјави од граѓаните.”, информира ЦИВИЛ.