Центарот за управување со кризи денeска соопшти дека состојбата со браната на акумулацијата Слатино се уште е непроменета и оти се преземаат соодветни мерки за да не дојде до нејзино целосно уривање.
Од Центарот апелираат до средствата за јавно информирање да не излегуваат со информации кои не се проверени од надлежен орган, со цел непотребно да не се создава паника во јавноста.
Вчера екипа на Ценатрот од Охрид препорача да се изврши контролирано испуштање на вода од акумулацијата преку испустните цевководи. Вкупното оштетување на браната во овој момент, како што се додава во соопштението, било со должина од 15-20 метри од круната на браната.
Дирекцијата за заштита и спасување од Охрид, се подвлекува во соопштението, на самото место со свои екипи за интервенција пристапи кон отворање на клапните од цевководите и при тоа се ослободи цевководот со пречник од 350 милиметри, а додека цевководот од 450 милиметри нема технички можности да се отвори.
Количествата на вода кои истекуваат од браната се проценуваат на 4-5 м3 /сек., што е приближно исто со дотекот во акумулацијата од Мраморечката река и изворите непосредно на брегот од акумулацијата.