Извесното новогодишно украсување за кое екс-градоначалникот на Скопје, Петре Шилегов склучил договор во вредност од 240.000 евра, предизвика лавина коментари од граѓаните на социјалните мрежи. Украсувањето би предвидувало поставување новогодишна елка на Плоштадот Македонија и украсување на неколку други локации и улици. Граѓаните во бунило-едни револтирани, други разочарани, трети во дилема зошто ќе има украсување за време на енергетска криза.
„Село гори, баба се чешла.“
„А на дрва ќе ги ложат светилките? Онака прашувам поради кризата со струјата.“
„Па нели е кризна состојба?“
Според дел од коментарите на социјалните мрежи, граѓаните сметаат дека украсувањето годинава не би требало да се спроведе и ја повикуваат новата градоначалничка на Скопје, Арсовска разумно да постапи по ова прашање со оглед на енергетската криза во која се наоѓаме.
„Данела по итно да го раскинеш договорот за украсување на град Скопје.“
„Под итно ова да се поништи. Народот крпи крај со крај а на Петре до украсување му дошло. Новата градоначалничка ова под итно да го поништи.“
Она што убедливо секоја година се коментира меѓу граѓаните во предновогодишниот период се вртоглавите суми со кои се обезбедува масовно украсување на главниот град. Граѓаните не само оваа, туку и изминатите години ја потенцираа важноста од пренамена на средствата наменети за украсување за цели кои ќе бидат од општа корист.
„Абе какво украсување. На кого му е до прослава после толку тешка и бурна година? Подобро тие пари донирајте ги за лечење на луѓе кои секој ден апелираат за помош.“
„Е арно машала. Народот нека страда, нека трпи во беда и сиромаштија.“
„Овие луксузи на никого не му требаат. Парите да се пренаменат за слаби водоводи, за многу неасфалтирани улици. Да се купат противпожарни возила, да се направат кружни текови за многу побрзо движење и многу други работи.“се само дел од коментарите на граѓаните на социјалните мрежи.
Марија Поповска