Претседателот на Комисијата 24 декември Борче Давитковски чека да се согласат на средба со него лидерите на двете страни, Груевски и Заев, за да дојде до позитивно решение, изјави Давитковски за НОВА.
Понудата за пролонгирање на рокот до вторник дошла од Брисел и следната фаза треба да биде лидерска средба заедно со Давитковски. Тој појаснува дека има уште неколку разлики кои треба да се усогласат, за да следи конечен извештај од Комисијата.
Претседателот на СДСМ, Зоран Заев, денеска пак излезе на прес-конференција каде информираше за основниот камен на сопнување, исфрлањето на новинарите на 24 декември.
-ВМРО-ДПМНЕ прифати формулација за уставни прекршување при употреба на сила и отстранување на пратениците од собраниската сала, но не беа подготвени да констатираат противуставност при отстранување на новинарите од собраниската сала на критичниот ден.
На 24 декември, Груевски донесе одлука, а Трајко Вељаноски ја прифати. Одлуката беше да се испратат полицајци во Парламентот со наредба да се исфрлат од собраниската сала прво новинарите, а потоа опозиционите пратеници. Секако, однапред знаејќи дека притоа по неколку основи се крши Уставот на Македонија. Груевски ќе остане запаметен по децата што просат околу сите објекти што ги изгради тој во центарот на Скопје, но ќе биде запаметен како премиер која на најдрзок можен начин го крши Уставот на Република Македонија исполнувајќи ја својата алчна потреба за пари, за време на криза и сиромаштија, рече Заев.
Според него, достоинството и дигнитетот на новинарите за опозицијата е еднаков со оној на пратениците.
Во меѓувреме, дел од македонските медиуми информираат дека сите опции се отворени откако пропадна и последниот обид на ад хок комисијата да се расчистат случувањата од 24 декември.
Порталот Прес 24 повикувајќи се на свои извори во ВМРО-ДПМНЕ објавува дека целосно се неточни информациите дека останало отворено само прашањето за исфрлањето на новинарите од собраниската сала.
Изворите на Прес 24 велат дека сведоци за тоа се претставниците на меѓународната заедница, а таквите брифинзи од како што велат, опозициските претставници се само обид за додворување пред новинарската фела.
Денеска биле исцрпени сите обиди да се најде финалниот извештај и дека не се планираат нови средби како и дека во индина, сите опции се отворени.
Од ВМРО – ДПМНЕ нема објаснување, што значи ставот, „Сите опции се отворени“ но нема ниту демант дека уште пред Нова Година можно е одржување на предвремени парламентарни избори.