Да се селектираат операциите на Хируршките клиники поради дефект во одделот за стерилизација. Писмо со ваква содржина пред четири дена е испратено до клиниките од страна на Заеднички служби. Во него се вели дека поради дефект на автоклавите, ( еден од апаратите кој работи на водена пареа) заради струен удар, тие не се во функција.
„Повикан е сервис ,кој се надевам брзо ќе го реши настанатиот проблем. Ве молиме да имате разбирање и да го селектирате оперативниот програм до отстранување на дефектот“, се вели во дописот од Заеднички служби.
Стерилизацијата е најважниот сегмент во хирургијата, бидејќи без стерилизација не се започнува ниту со шиење на рана , а не пак да се прави операција. Со стерилизација се уништуваат сите микроорганизми и нивните спори, кои може да доведат до тешки инфекции кај пациентите. Иако писмото е од 23 ноември, ситуацијата не промената.
Директорката на Заеднички служби, Шкодране Дерлишта за НОВА изјави дека тендерот за сервисирање чија процедура трае околу еден месец, е во тек.
„Во моментот чекаме да помине рокот на жалби кој трае осум дена и да ја избереме фирмата која треба да изврши сервисирање, како најевтин понудувач. Не е страшно, имаме други стерилизатори кои функционираат, расипан е само еден апарат од старите“, изјави Дерлишта за НОВА.
Сепак, лекарски извори за НОВА велат дека со стерилизацијата на инструментите се снаоѓаат, но мантилите, униформите со кои оперираат и останатите работи ги земаат, односно ги стерилизираат на Клиниката за гинекологија.
„Работиме со мантили од гинекологија“, велат лекарите.
Тие потенцираат дека стерилизацијата е многу важна во оперативната процедура, а состојбата со одделот за централна стерилизација е катастрофална.
„Повеќе години наназад никој не се грижи за овој оддел кој опслужува 16 операциони сали, а тоа е срцето на Хирургија, “коментираат лекарски извори за НОВА.
Некои од директорите на клиниките не сакаа да ја коментираат настанатата состојба, а на Неврохирургија тврдат дека нема застој на операциите.
Сепак, лекарите велат дека проблемот со стерилизацијата е многу сериозен бидејќи од тоа зависи и успехот на операцијата, бидејќи доколку дојде до инфекција тоа може да чини човечки живот.
Сепак, за Дерлишта поголем проблем е хаосот со паркингот на скопските клиники. Таа вели дека откога Владата пред две години им го даде на стопанисување паркинг просторот на Градски паркинг владее потполн неред, а возилата со Итната медицинска помош не можат да се пробијат, да влезат на клиниките. Дерлишта вели дека и покрај тоа што с е обратиле во Министерството за здравство, до директорот на Градски паркинг и до градски сообраќај, ситуацијата не е променета.
„Нашето обезбедување често има проблем иако Градски паркинг треба да воведе ред. Не може возилата да се дозволи да се паркираат на улица, кога тие располагаат само со паркингот, не и со улиците. Деновиве бев свекок кога брзата помош не можеше да влезе па, родителите на раце го земаа своето дете, со инфузија на рака и се стрчаа до клиниката. Тоа е страшно“, рече Дерлишта.
Во вакви ситуации, секогаш подебелиот крај го влечат пациентите. Без разлика дали се работи за расипан апарат, што често се случува со Компјутеризираната томографија на пример, која е многу важна при снимање на повредени во сообраќајни несреќи или други сериозни повреди или пак се работи за паркинг место кое е невозможо да се најде во текот на денот. Надлежните со години замижуваат на овие проблеми.