Весникот ДЕН денеска не се појави во трафиките. Директорот Јован Јовчевски вчера попладне симболично ги изгаснал светлата во редакцијата, како знак дека весникот повеќе нема да излегува. Причината за згаснувањето на весникот се неисплатените три и пол плати кои сопственикот им ги должи на вработените, новинарите и техничкиот кадар.
-Сакавме да правиме објективен медиум кој нема да биде политички ориентиран. Немавме политички притисоци, причината за згаснувањето на ДЕН е исклучиво од финансиска природа. Во услови на беспарица, кога од ноември немаме земено плата вработените одлучија весникот повеќе да не излегува изјави за НОВА ТВ Бране Стефановски главен и одговорен уредник на сега веќе згаснатиот весник ДЕН.
Медиумскиот простор од денес е посиромашен за уште еден весник. Иако уште на почеток го следеа контраверзии, во смисла на тоа кој стои зад весникот, ДЕН сепак успеа да се наметне како бренд. Во него работеа искусни новинари од згаснатиот весник Време и поранешна А1 телевизија.
Тие велат дека по судски пат ќе си ги бараат заостанатите плати иако не се знае кој е вистинскиот сопственик, откако се направија неколку трасфорамации на соптвеничката структура.
-Тој што се преставува како инвеститор не ги исплати платите, затоа одлучивме по судски пат да си ги бараме заработените пари објаснуваат за НОВА вработени од весникот.
Како основач на ДЕН сеуште фигурира првиот сопственик Живко Серафимовски, така што вработените велат дека од него ќе си ги бараат заостанатите плати.