Скопје денеска е во фокусот на вниманието светската фудбалска јавност. Во 20.45 часот Реал Мадрид и Мачестер Јунајтед на Телеком Арената ќе се борат за трофејот на УЕФА Супер купот.
Двете екипи пристигнаа вчера на аеродромот „Александар Велики“ од каде, под строги безбедносни мерки, беа превезени до хотелите во кои престојуваат, Реал Мадрид во „Александар Палас“, а Манчестер Јунајтед во „Гранд плаза“.
Го одржаа и вообичаениот тренинг и ги почувствуваа пеколните температури, па поради тоа УЕФА најави дека ќе има прекини на натпреварот на секои 30 минути за освежување на играчите.
Според правилата, доколку температурата за време на натпреварот достигне 32 степени, ќе има прекини во 30 и во 60 минута.
Сепак од УЕФА се надеваат дека фудбалерите нема да се соочат со температурни шокови, бидејќи натпреварот се игра доцна навечер, и се очекува пад не температурата, која за денеска според најавата во текот на денот ќе достигне до 38 степени. Исто така играчите дел од подготовките одработија во јули во Лос Анџелес, Калифорнија каде исто така има високи температури.
Токму временските услови беа една од темите на кои вчера на прес конференцијата говореше тренерот на Манчестер Јунајтед Жозе Мурињо.
-Знаев дека времето е вакво. Откако се вративме од турнејата во САД, решив во Манчестер да тренираме во 16:00 часот, за играчите да ја почуствуваат топлината. Но врнеше секој ден“, рече Мурињо.
Вниманието на јавноста вчера го привлече и изјавата на Мурињо дека Горан Пандев е најдобриот македонски фудбалер во историјата и оти сака да се обезбеди приватен авион и вечерва да го види по Пандев на натпреварот.
Италијанецот Џанлука Роки ја доби довербата на Европската фудбалска асоцијација за делење правда во Суперкуп пресметката меѓу Реал Мадрид и Манчестер јунајтед.
На 43 годишниот арбитар од Фиренца ќе му асистираат пет негови сонародници. Крај аут линиите ќе бидат Еленито ди Либераторе и Мауро Тонолини, работните места зад головите ги добија Давиде Маса и Масимилијано Ирати. За резерва на Роки е одреден Рикардо ди Фиоре, а четврти судија ќе биде Французинот Клемен Турпан.
Роки е интернационален судија од 2008 година и досега бил главен судија на 72 меча под капа на УЕФА. Беше делегиран за девет натпревари во европските купови во сезоната 2016/17. Меѓу нив и осминафиналниот реванш меѓу Монако и Манчестер сити, четвртфиналниот реванш судир на Лестер и Атлетико Мадрид во Лигата на шампиони како и првата полуфинална средба во Лига Европа (ЛЕ) на Ајакс и Олимпик Лион. Беше и четврти судија во финалето во ЛЕ на „Френдс арена“ во Стокхолм во кое играа Манчестер јунајтед и Ајакс.
Во сезоната 2008/09, Роки му судеше на Пелистер против АПОЕЛ во првото квалификациско коло за Лига Европа.
Ѓаволи и Кралеви – Бела ноќ во Скопје
Стотици фанови ги пречекаа ѕвездите на двете екипи на скопскиот аеродром и пред нивните хотели. На плоштадот се поставени фанзоните, илјадниците фанови од Србија, Бугарија, Грција, Хрватска и секако од Шпанија и Англија, од вчера ги „окупираа“ кафулињата и рестораните во центарот на градот.
Улица „Македонија“, вообичаено главна артерија во централното градско подрачје за променада, и истоимениот централен плоштад се преплавени со луѓе почнувајќи од хотелот „Бристол“, па таму некаде до „Даут Пашин Амам“.
Ги има од сите возрасни категории, но, се чини, во атмосферата што е налик на карневалска најмногу уживаат и најсилно бијат детските срца.
Атмосферата разиграна на највисоко ниво, но она што вчера преку ден и посебно вечерта можеше да се забележи е дека доминираат фановите на англискиот фудбалски клуб Манчестер Јунајтед во пресрет на утрешниот Суперкуп со шпански Реал Мадрид.
И покрај различните информации, во Скопје сепак пристигна можеби најдобирот играч на денешницата, Кристијано Роналдо, кој имаше проблеми со повреда. Но дали ќе игра, се уште не се открива.
-Роналдо нема многу тренинзи со нас пред овој натпревар, но може да кажам дека е подготвен да игра. Јасно е дека не залудно го носиме во Македонија. Штом дошол тука со нас, значи дека е подготвен да игра, а дали ќе настапи од првата минута ќе видиме утре. Најважно во овој момент е дека е тука со нас, а тоа е огромно значење за тимот, рече тренерот на Реал Зинедин Зидан.
Полицијата најавува посебен сообраќаен режим и ригорозни контроли.
Во ВИП делот на „Телеком Арената“ ќе биде врвот на европскиот и светскиот фудбал – легендарните сер Алекс Фергусон, сер Боби Чарлтон и Емилио Бутрагењо.
Европската фудбалска федерација (УЕФА), синоќа одржа прием по повод финалето на Супер купот на УЕФА.
Фудбалскиот спектакл во Скопје ќе се пренесува во живо.
Супер куп – пресек
– Реал Мадрид по шести пат ќе учествува во Супер купот. Досега има три победи и два пораза.
– Манчестер Јунајтед во Супер купот има една победа и два пораза.
– Победниците од Лига на шампиони победиле во 22 од 41 претходни напревари од Супер купот.
– Манчестер јунајтед учествувал досега трипати во Супер купот и победил еднаш – во ноември 1991 година против Црвена Ѕвезда. Оттогаш тој клуб двапати е поразен – 1-0 од Лацио во 1999 година и 2-1 пораз од Зенит Санкт Петербург во 2008 година.
– Реал Мадрид победиле во три наврати. Шпанскиот клуб победил во 2002 година против Феенорд (3-1), Севилја 2-0 во Кардиф 2014 година и 3-2 против Трондхајм лани. Загубиле двапати – од Челзи во 1998 година1-0 и пораз од 2-1 и од Галатасарај во 2000 година.
– Двата клуба играа на 24 јули во рамки на американска турнеја. Резултатот беше 1-1. Јунајтед победи на пенали. Претходно, Реал на Олд Трафорд го победил Манчестер со 2-1. Тренер на Реал тогаш беше Жозе Мурињо.
– Манчестер јунајтед нема пораз во 11 европски натпревари.
– Последен англиски клуб што го освои Супер купот е Ливерпул во 2005 година.
– Главниот судија на натпреварот Џанлука Рочи (43) ќе суди четврти напревар на Манчестер и прв по поразот од 2-0 во Лига на шампиони од Олимпијакос во 2014 година. Судија на ФИФА листата е од 2008 година.
– Досега се организирани 41 натпревар од Супер купот. Од 2013 година финалните напревари се одржуваат во различен европски град – Прага во 2013 година, Кардиф во 2014 година, Тбилиси во 2015 година, Трондхајм во 2016 и Скопје 2017 година.
– Вклучувајќи ја и 2017 година, Шпанија има рекорден број на тимови кои учествувале во Супер купот – 25 (Барселона 9, Реал Мадрид 6, Севилја 5, Валенсија 2, Атлетико Мадрид 2, Реал Сарагоса 1). Англиски тимови – 16 (Ливерпул 5, Манчестер Јунајтед 4, Челзи 3, Нотингем форест 2, Арсенал 1, Астон вила 1), три повеќе од Италија (Милан 7, Јувентус 2, Интер 1, Парма 1, Лацио 1, Сампдорија 1).
– Шпанските тимови држат рекорд со најголем број победи – 13 (Барселона 5, Реал Мардид 3, Валенсија 2, Атлетико 2, Севилја 1) четири повеќе од Италија и шест повеќе од Англија.
– Барселона со победата во 2015 година е на исто ниво со Милан – по пет победи. Ливерпул и Реал Мадрид (три) се на второто/третото место.
– Шест финални натпревари биле одлучени во продолженија.
– Во 2013 година напреварот бил за првпат завршен со пенали (Баерн го победи Челзи со 5-4 на пенали. Во регуларните 90 минути беше 2-2 во Прага).
– Најмногу голови постигнала Барселона во победата во 2015 година против Севилја (5-4). Атлетико во 2012 година го победи Челзи со 4-1, Ливерпул (2001,2005), Реал Мадрид (2002,2016), Севилја (2006) и Милан (2007) постигнале по три голови во Супер купот.
– Во финалето четири натпревари завршиле со резултат 1-0
– Досега не се случило во финалето на Супер купот да нема голови
– Најбрзо постигнат гол бил во 2015 година кога Евер Банега постигна гол за Севилја во третата минута против Барселона.
– Олег Блохињ (Динамо Киев) Радамел Фалкао (2012 Атлетико против Челзи) и Тери Мекдермот (1977, Ливерпул против Хамбург), Лионел Меси (Барселона), Герд Милер (Баерн Минхен), Роб Ренсебринк (Андерлехт), Франсоа Ван дер Елст (Андерлехт) се играчи кои постигнале три голови во Супер купот.
– Единствен автогол е постигнат на финалето во 1998 година (Феенорд против Реал Мадрид. Автоголот го постигна Патрик Пауве од Феенорд)
– Единствен црвен картон добил Пол Сколс против Зенит во 2008 година.
– Откажани се досега три натпревари од Супер купот – во 1974 поради политички проблеми Баерн од СР Германија не играше против Магдебург од ДР Германија…Во 1981 година Ливерпул и Динамо Тбилиси не се договорија за датумот на натпреварот…По трагедијата на стадионот Хејсел во 1985 година, Јувентус и Евертон не играа во Суперкупот во 1985 година.