Скопје вечерва пулсира во амбиент на бела ноќ. Причината е спортска, поточно фудбалска. Магијата на најважната споредна работа на светот ја крена на нозе македонската престолнина која никогаш не била пораздвижена во летната сезона на капење. Поинаку и не може да биде во град во кој во истовреме се наоѓаат клубови со првокласно педигре како Реал Мадрид и Манчестер јунајтед, менаџери како Зинедин Зидан и Жозе Мурињо и ѕвезди од калиброт на Кристијано Роналдо, Серхио Рамос, Герет Бејл, Лука Модриќ, и компанија од една страна и Пол Погба, Хуан Мата, Ромелу Лукаку, Немања Матиќ и останатите од друга.
Улица „Македонија“, вообичаено главна артерија во централното градско подрачје за променада, и истоимениот централен плоштад се преплавени со луѓе почнувајќи од хотелот „Бристол“, па таму некаде до „Даут Пашин Амам“. Ги има од сите возрасни категории, но, се чини, во атмосферата што е налик на карневалска најмногу уживаат и најсилно бијат детските срца.
Фудбалскиот хепенинг кој, веројатно, ќе биде и најголем во регионот за наредните пет до десет години, сепак, е празник за очи и душа и за повозрасните. Неповторливиот момент е овековечен со селфи фотографии и видеа како спомен и прераскажување за идните генерации кога во Скопје се истоварија фудбалски колективи чија вкупна вредност надминува една милијарда евра и нивните армии навивачи како сојузничките трупи во Нормандија за време на Втората светска војна.
Националната арена е подготвена за фудбалскиот спектакл. Нашминкана и дотерана како манекенка за модна ревија ќе блесне со сиот сјај како единствена во опкружувањето во последните десетина години во која ќе биде крунисан освојувач на престижен европски трофеј. Мерките на безбедност се, исто така, на највисоко ниво. Безбедносните служби најавуваат дека се оперативно подготвени и ставени во целосна мобилност, а преземените мерки се поистоветуваат со оние при посетата на американскиот претседател Бил Клинтон во 1999 година.
Скопје и Македонија се подготвени за впивање на магијата. Денот е резервиран за загревање, можеби и уживање и дружење во „кралската“ фан зона преку Камениот мост или во „ѓаволската“ на платото пред Спомен куќата на Мајка Тереза. Шоуто, во секој случај, може да започне.