Обвинителите од Основното јавно обвинителство на денешната прес-конференција соопштија дека оформени се повеќе предмети за случајот „фабрика за изработка на лични карти“, по пријавата на новинарот Љубиша Арсиќ.
Како што информираше обвинителот Јован Цветановски, интензивно се постапувало за случајот и во текот на истражната постапка биле извршени вештачења на предмети и претреси.
Како што посочи тој, кај осомниченото лице З.Б, пронајдени биле обрасци за патни исправи, лични карти и други документи, како и опрема за фалсификување, преси, секачи и друго.
При претресот на компјутерите на ова лице, пронајдени биле фајлови на десетици илјади телефонски разговори.
Се води постапка против повеќе лица, а одлуката каква мерки ќе се преземат во иднина ќе зависи од истрагата. Засега само едно лице се наоѓа на отслужување затворска казна за друго кривично дело.
Во овој момент од ОЈО велат дека поради сензитивноста на настанот, не можат да споделуваат дополнителни информации.
На прес-конференцијата не беа дозволени новинарски прашања.