На 14 Октомври (петок) во ноќниот клуб „Станица 26“ во соработка со скопската продуцетска куќа Баланс ќе настапи братското дуо „Octave One“ од Детроит. Градот Детроит е директна инспирација за повеќегодишното работење на Баланс и претставувањето на Техно артистите од САД.
Octave One претставува група на американски техно музичари, предводени од браќата Лени и Лоренс Бурден, кои понекогаш настапуваат и со нивните останати тројца браќа Лорн, Лајнел и Ленс. Во 1989 година ова дуо дебитираше во рамки на издавачката куќа „Transmat“, која припаѓаше на таткото на детроитското техно, Дерик Меј со синглот „I believe“. Истиот сингл беше дел од компилацијата Techno 2: The Next Generation (10 Records). Инаку Octave One се познати по тоа што имаат направено ремикси на песни од Масив Атак, Стив Баг, Инер Сити, Џон Томас… Во 2000 година ја издадоа својата најпозната плоча „Blackwater“. По само две години албумот беше преработен, беше направен нов аранжман и изведен од „Урбан соул Оркестра“ од Лондон, Велика Британија. Тие денес се сметаат за втората генерација музички артисти од детроитската техно сцена.
Баланс досега пред домашната публика има претставено имиња како што се: Derrick May, Das Efx/SAF, Laurent Garnier, Carl Craig, Juan Atkins, Kevin Saunderson, Gene Farris, L Lorca, Kenny Larkin, Steacy Pullen, Alton Miller, Reggie Dokes, Funk D’void, Steve Rachmad, Joris Voorn, Christian Smith, Charles – Technasia, Samuel L. Sesion, Alexander Robotnick, Santiago Salazar, Johannes Volk, TR, Buzz Goree aka Clandestine, Octave One, Terrence Parker, Dj Bone, Scan 7, Subotika…
Според списокот на артисти кои досега оваа реномирана продуцетска куќа ги има донесено пред македонската јавност може многу лесно да се констатира дека нивна цел е да се презентираат различни музички жанрови, кои имат допринесено да се подигне критериумот на македонските сладокусци на добриот ритам.
Гостувањето на Octave One се први од серијата настани кои следат во ноќниот клуб „Станица 26“. Домашна поддршка ќе бидат Томи Бојаџи и Самоил Радински сопственик на веќе светски познатиот „Logos recordings“. Инаку Самоил е еден од иницијаторите за создавање на Баланс. Исклучителни артисти и гордост за македонската електронска сцена…
Билети за забавата може да набават во Излет Кафе, Кино Карпош и Радио Бар.