Владина делегација предводена од министерот за земјоделство, шумарство и водостопанство Љупчо Димовски во која ќе биде и заменик-министерот за одбрана Емил
Димитриев ќе присуствува на одбележувањето на деветгодишнината од смртта на претседателот Борис Трајковски кај Ротимље, близу Мостар.
Во авионската несреќа животот го загубија и осумте членови на претседателската делегација како и екипажот на кингерот.
Претседателот Борис Трајковски загина на денешен ден во 2004 година во авионска несреќа во близина на Мостар. Во несреќата, покрај Трајковски животот го загубија Димка Илкова-Бошковиќ, Ристо Блажевски и Анита Кришан Лозановска од Кабинетот на претседателот, Миле Крстевски од Министерството за надворешни работи, Борис Велинов и Аце Божиновски, членови на обезбедувањето и пилотите Марко Марковски и Бранко Ивановски.
На гробиштата во Бутел на гробот на претседателот Борис Трајковски цвеќе ќе положи делегација на Собранието на Република Македонија.
На почетокот на овој месец во Македонија допатува главниот истражител Омер Кулиќ, кој објави дека е повторно отворена истрагата за авионската несреќа во која загина претседателот, воедно објавувајќи дека се очекува истрагата да трае од шест до 12 месеци, за разлика од првичната истрага која траела само два месеци.
Тој информираше дека петнаесетчлениот меѓународен тим го сочинуваат експерти од БиХ, Хрватска, Србија, како и од Македонија, а нивните имиња нема да бидат соопштени на јавноста со цел да се избегне евентуално влијание врз нивната работа.
– Оваа Комисија не ја утврдува вината и одговорната особа, туку фактите и тоа како дошло до несреќата. Штом биде готов извештајот ќе биде доставен на обвинителството и на веб-страницата на Министерството за транспорт и врски на БиХ, рече Кулиќ.
Кулиќ на заминување од Македонија упати апел до јавноста кој има какви било сознанија вредни за истрагата да и ги достави на оваа Комисија во текот на истрагата оти по нејзиното завршување тие нема да бидат релевантни, потсетувајќи дека прикривањето на докази претставува кривично дело.