Верче Туфекчиева има девет години, Даунов синдром и голем проблем за кој не може да најде решение. Ова девојче од почетокот на мај има силни болки во коленото кои ја спречуваат да оди, а снимањето на магнетна резонанца преку „Мој термин“ и е закажано дури за септември. Електронскиот систем „Мој термин“ покажал прв слободен термин во септември, а приоритен упат кој се користи во итни случаи, не можело да се добие.
Нејзината мајка Анче, вели вели дека септември е далеку, а Верче има силни болки и веќе не може да се движи. Таа прашува, како е возможно да не постои начин ваквите случаи да се снимаат побрзо. Особено како е возможно лицата со посебни потреби, како и децата со Даунов синдром да немаат предност, да не мораат да чекаат за снимања.
„Многу се разочаравме зарем детето ќе го оставиме до септември во кревет неподвижно без да се утврди што е проблемот без да може да се лекува, а со тоа и да и се намалат и болките“, вели за НОВА нејзината мајка, Анче Туфекчиева.
Анче за НОВА раскажува дека нејзината ќерка Верче е многу борбено девојче, но болката која ја мачи скоро цела година, а во последниот месец е многу силна ја онеспособува да се движи. Поминале многу лекари, ортопеди, ревматолози, ендокринолози, кардиолози, но ниту еден на нашол во што е проблемот. За тоа време поради лошото газење, потпирање само на прстите и штедење на ногата, довело до искривување на коските кај прстите на нозете.
“Секое утро се будиме и гледаме како таа ќе стане дали ќе има болки или не. На 2 мај оваа година Верче стана утрото со страшни болки во левото колено. Можеби таа неможе уште да зборува но, точно знае што сака и точно знае што ја боли. Ја задржаа на детска клиника четири дена и ни рекоа дека е ортопедски проблем. На крај остана само да се направи магнетна резонанца. Но, ете како што кажав снимањето ни го закажаа дури за во септември“, раскажува Анче Туфекчиева.
Борбата на семејствата кои живееат со лица со посебни потреби значи секојдневна борба со околината за да им се покаже дека тоа дете е исто како сите, дека никогаш нема да направи ништо лошо и дека и тоа како дел од оваа човештво ги заслужува истите права како секој граѓанин на оваа земја, објаснува оваа жена.
„Нашата приказна секој ден е различна се бориме со сите препреки, станавме и доктори и наставници и логопеди и дефектолози, затоа што на секој начин сакаме да помогнеме на своите деца“ вели Анче Туфекџиева.
Семејството на Верче искрено се надеваат дека здравствениот систем ќе им помогне да го остварат правото на лекување на Верче, за таа повторно да може да застане на свои нозе.
НОВА испрати прашања до Министерството за здравство, дали луѓето со посебни потреби имаат некаква предност во однос на закажување преку „Мој термин“, особено децата со Даунов синдром. Зошто за снимање на магнетна резонанаца се чека со месеци, кога се набавија нови апарати со образложение дека така ќе се намали времето на чекање. До објавување на текстот одговор не добивме.