Две девојки, едната од Македонија, а другата од Русија од јули до октомври минатата година биле „заробенички“ во угостителски објект во гостиварско, и биле експлоатирани сексуално и работно, за што Обвинителството по втор пат му го продолжи денес притворот на сопственикот на објектот. Девојките работеле едната на шанк и како келнерка, додека другата како танчерка.
Искористувајќи ја состојбата на ранливост на дваесет и двегодишната Македонка обвинетиот и понудил заштита и времено засолнување од лице што наводно нудело пари за нејзино пронаоѓање, ја сместил во просториите на неговиот угостителски објект и и понудил работа. По одредено време, газдата побарал за неговата услуга за заштита, девојката да прави сѐ што ќе ѝ каже бидејќи сметал дека таа е „негова сопственост и со неа ќе прави што сака“. И покрај противењето на девојката, тој не само што лично сексуално ја злоупотребувал, туку ја присилувал и да дава сексуални услуги и на други лица од кои наплаќал од 50 – 100 евра. За да може подолго да работи, ја принудувал да користи кокаин. Девојката добивала по 1500 денари на две недели за извршувањето на работите во угостителскиот објект, кои газдата веднаш ѝ ги земал. Воедно, тој насилно ѝ ја одзел и платежната картичка од која без нејзина согласност ја подигнал целата сума во износ од 18.000 евра.
Руската државјанка, пак, пристигнала во Македонија кон крајот на август 2021 година. Иако според првичниот договор таа требала да биде танчарка, обвинетиот покрај танцувањето барал и дополнителни услуги од неа односно да му дава сексуални услуги нему, на неговите пријатели и гости во објектот за што наплаќал од 3000 – 8000 денари, а девојката не добивала ништо за возврат. Неможејќи да го издржи физичкото, психолошкото и сексуалното малтретирање девојката искористила погоден момент и го напуштила угостителскиот објект, се наведува во соопштението од Обвинителството.
По спроведена истражна постапка, надлежен јавен обвинител поднесе обвинителен акт против едно лице кое според опишаните дејствија сторило кривично дело „трговија со луѓе“. Судот денесму го продолжи притворот на обвинетиот, кому му се заканува казна затвор од најмалку четири години. (Р.Н.)