Сега е најважно да му помогнеме на населението, да не се занимаваме со барање на виновници и на жртви, да не го политизираме целиот овој настан и сите капацитети на сите структури да се стават во помош на населението, апелираше денеска премиерот Емил Димитриев одговарајќи на прашање на НОВА, што е со истрагите за смртните случаи од поплавите во скопско.
– Во моментов институциите работат на терен и евентуално наоѓање на нови жртви. Јас се надевам дека до тоа нема да дојде меѓутоа не можеме таа опција да ја исклучиме со оглед на површината која беше зафатена од непогодата. Истрагите околу ефикасно функционирање на институциите се одвиваат паралелно. Ние сме два дена после случувањата и оправдано е акцент да дадеме на помош и поддршка на населението, одговори Премиерот.
Во меѓувреме и понатаму останува мистерија како загинаа луѓето во невремето? Дали се удавија, се повредија, починаа од природна или насилна смрт? Каде, на кое место?
Прашањата на НОВА, институциите ги пренасочуваат од една кон друга.
Од МВР велат дека овие информации не се во нивна надлежност, па не упатија во Кризниот штаб и Центарот за управување на кризи. Од оваа институција не препратија во Владата, кај владиниот портпарол Александар Георгиев.
Од Јавното обвинителство соопштија пак дека критичната вечер, јавен обвинител не излегол на терен бидејќи нема ингеренции да постапува во услови на елементарни непогоди и во случаи каде нема сомнение за сторено кривично дело.
Откако дежурен јавен обвинител од Основното јавно обвинителство – Скопје бил известен од МВР тој ги дал сите потребни инструкции за постапување на полициските екипи на терен.
Истовремено дежурниот јавен обвинител од страна на полициските екипи бил известен дека на теренот каде беа пронајдени телата не може да се врши увид и фотографирање, затоа што е непристапен и непрооден, а на истиот пристап имаат само специјални единици од МВР и од АРМ со чамци и оклопни возила.
Димитриев при денешната посета на селото Стајковци, каде се консултираше со министерот за труд и социјална политика Диме Спасов, потенцираше и дека одговорноста која ја имаат институциите не е заборавена и во еден момент таа ќе биде анализирана дали има одреден пропуст во работењето, и согласно тоа ќе следат и одредени мерки но дека засега целата концентрација на институциите е да им се помогне на ќителите во регионот на Сингелиќ Стајковци и Арачиново.
Официјалниот број на загинати до денес е 22, а како исчезнати се водат 6 лица. Нема информација како е вршена иденфтификацијата на жртвите и клучното прашање е зошто не е направена обдукција на телата, која е законски задолжителна во вакви случаи.