Со 55 гласа „против“ и 53 гласа „за“ во Собранието не помина интерпелацијата за вицепремиерот за европски прашања Никола Димитров. Барањето за интерпелација отвори жестока политичка дебата во Собранието.
Односите со Бугарија, недобивањето на датум за старт на преговорите на земјата со ЕУ за кој неколкупати уверуваше владата беа главни аргументи со кои опозициската ВМРО-ДПМНЕ го бранеше барањето за интерпелацијата на вицепремиерот за европски прашања. Речиси во текот на целиот ден реториката во законодавниот дом зачинета со дипломатските прашања кои според опозицијата – власта не успеала да ги реши.
Димитров пак ги бранеше позициите порачувајќи дека власта достоинствено ги издржала сите нанесени рани кои како што рече – опозицијата ги ставала на контото на партиски поени, додавајќи дека идентитетот и јазикот во ниту еден случај не биле доведени во прашање.
Првиот човек надлежен за евроинтегративните процеси на земјата посочи дека недобивањето на датум за преговори во октомври или во јуни 2019 година нема никаква причинско-последична врска со реформската кондиција кај нас дома. Тој како што рече, лично францускиот претседател Макрон и германската канцеларка Ангела Меркел кажале дека прашањето е поврзано со внатрешната дебата во Франција во однос на реформите во рамките на Европската Унија.
-Во огромен дел, во интерес на јавноста ова сакам да го потенцирам, има за замена на тези и спинови. Суштински, кога правите конфузија меѓу мојата дипломатска кариера и мојата политичка кариера, ја замајувате јавноста. Јас не сум бил член на било која од Владите на Груевски. Јас сум во МНР од 1 август 1996 година, примен како прв на голем конкурс, првенец на Правниот факултет. Имав пауза, магистрирав меѓународно право во Кембриџ. Имав една авантура 2000та година неколку месеци, кога многу притискав да ги ревоспоставиме дипломатските односи со Кина, тврдејќи дека Тајван авантурата е голема грешка. Таа беше мојата два-тримесечна политичка авантура во 2000та.
-Јас сега, во претходната влада влегов како активист, сега бев на избори, имав кампања и имам апсолутно политички легитимитет да бидам пред вас и да зборувам овде. И вие сте избрани и јас бев избран, само што отидов во извршната власт повторно врзана со мојата една те иста мисија од 1 август 1996 до 3 февруари 2021 година – таа мисија е македонската кауза. Јас не сум бил член и уште не сум на ниту една политичка партија. Мене македонската кауза ми е животен повик.
-Ајде сега да видиме таа кауза каде беше претходно, со сите грешки и слепила направени од слепила, дали зла намера не сакам да верувам, каде е денеска… Бевме Поранешна Југословенска Република Македонија во светското семејство и во сите меѓународни владини организации, државјанството ни беше на ФИРОМ… Денес сме Северна Македонија и на Република Северна Македонија, не сме Тунгузија, нашата држава, нашата територија за која немаме спорови е во северниот дел на регионот, поширок регион Македонија, заедно со други држави… Македонскиот јазик си е во нашата лична карта и ја заокруживме државноста и членството во Обединетите Нации. Влеговме во НАТО! 2014, 2015, 2016 година престанаа да зборуваа за нас по ходниците на НАТО… И бидејќи има обезбедување околу седиштето во Брисел, не можевме ни од прозор да видиме што се случува и како се случува внатре, меѓу другото тешки ни беа цокулите на античките војници за да можеме да ѕирнеме… Тоа нема врска со македонската кауза. А македонскиот јазик што го изгубивте во 2006 година е вратен лани во нацрт-преговарачката рамка и ние како Македонци што зборуваат македонски јазик ќе успееме и со европската интеграција бидејќи знаеме како, покажавме, изјави Димитров пред пратениците.